Лондоннинг «Челси» жамоаси бош мураббий Томас Тухелни истеъфога чиқарганини маълум қилди.
«Аристократлар» Чемпионлар Лигасининг 1-турида «Динамо» Загреб жамоасига 0:1 ҳисобида мағлуб бўлди. Бу немис мутахассисининг жамоа бош мураббийи сифатида 100-ўйини эди.
Ҳозирда «Челси» АПЛда 6-ўринни эгаллаб турибди. Жамоа ҳисобида 3 та ғалаба, битта дуранг ва 2 та мағлубият қайд этган.
Лондон клуби хўжайинлари 49 ёшли мураббийнинг истеъфоси бўйича баёнот берди:
«‘Челсиънинг барча ходимлари номидан Томас ва унинг штабига меҳнати учун раҳмат айтмоқчимиз. У мураббий сифатида жамоа тарихидан жой олади.
Янги хўжайинлар клубда иш бошлаганига 100 кун бўлди. Улар клубни ривожи бўйича қаттиқ меҳнат қилмоқда. Раҳбарлар мураббийни алмаштириш вақти келган, деб ҳисоблайди.
‘Челси’ мураббийлар штаби жамоани кейинги ўйинга тайёрлаш ва машғулотларни ўз зиммасига олади. Янги мураббийни тайинлаш бўйича тезкор ишлар олиб борилмоқда.
Янги мураббий келгунга қадар бошқа маълумотлар берилмайди».
Тухель 2021 йил январь ойидан буён клуб бош мураббийи сифатида ишлаб келаётган эди. Мураббий «аристократлар» билан 2020/21 йилги мавсум Чемпионлар Лигаси, УЕФА Суперкубоги ва Клублар ўртасидаги Жаҳон Чемпионати совринини қўлга киритган.
«Челси»нинг кейинги ўйини 10 сентябрь куни сафарда «Фулҳэм»га қарши бўлиб ўтади.
Изоҳ (0)