Япония ҳукумати Россия Қуролли кучларининг, жумладан Курил оролларида «Восток-2022» ўқув машғулотларини ўтказаётганидан хавотирда, деди Япония ҳукумати бош котиби Хироказу Мацуно Токиодаги матбуот анжуманида.
«Россия Мудофаа вазирлиги 26 июль куни тўртта шимолий оролни (Япония Курил оролларини шундай деб атайди— «Дарё» изоҳи) ўз ичига олган ҳудудда машғулотлар ўтказилишини эълон қилганидан сўнг, биз дипломатик каналлар орқали Россия томонига норозилик билдирдик, чунки бу ороллардаги позициямизга тўғри келмайди. Биз тўртта шимолий орол машғулотлар ўтказиладиган ҳудуддан чиқарилишини қатъий талаб қилдик», — деди у.
Мацунонинг сўзларига кўра, Япония Украинада махсус ҳарбий операция давом этаётган бир пайтда «Восток-2022» машғулотларининг ўтказилишидан хавотирда ва россиялик ҳарбийларнинг ҳаракатларини кузатишда давом этмоқда.
«Восток-2022» машғулотлари 1—7 сентябрь кунлари Россия Шарқий ҳарбий округида, шу жумладан Охота денгизи ва Япон денгизининг сувлари ҳамда қирғоқбўйи ҳудудларида ўтказилади. Уларда Коллектив Хавфсизлик Шартномаси Ташкилоти (КХШТ), Шанхай Ҳамкорлик Ташкилоти (ШҲТ) ва Россиянинг бошқа ҳамкор давлатларидан 50 мингдан ортиқ ҳарбий хизматчилар иштирок этади, дея хабар берган Россия Мудофаа вазирлиги.
Ҳарбий вазирлик машғулотлар мақсадини минтақада хавфсизликни таъминлаш учун ҳамкор давлатлар ҳарбий контингентларининг биргаликдаги ҳаракатларини яхшилаш деб атаган.
Изоҳ (0)