Ижтимоий тармоқларда Фарғона жамоат саломатлиги тиббиёт институти ва Кубан давлат тиббиёт университети ҳамкорлигида ташкил этилган қўшма таълим йўналишида таҳсил олаётган талабалар ва уларнинг ота-оналари мурожаати эълон қилинганди. Институт талабаларининг мурожаати ижобий ҳал этилди, деб хабар бермоқда Соғлиқни сақлаш вазирлиги матбуот хизмати.
Қайд этилишича, мурожаатда Кубан давлат тиббиёт университетида «Стоматология» йўналиши бўйича ўқишни давом эттириш учун ташкил этилган имтиҳонларда етарли балл тўплай олмаган айрим талабаларнинг норозилиги акс этган. Мазкур ҳолат юзасидан тезкор ўрганишлар олиб борилган.
Фарғона жамоат саломатлиги тиббиёт институтида 2019–2020-ўқув йилидан бошлаб Россиянинг Кубан давлат тиббиёт университети билан ҳамкорликда «Даволаш иши» ва «Стоматология» қўшма таълим йўналишлари ташкил этилган.
2019 йил 27 мартда икки томонлама тузилган шартномага мувофиқ, ўқишга қабул қилинган талабаларнинг «Даволаш иши» йўналиши бўйича 3 йил Ўзбекистонда ва 3 йил Россияда, «Стоматология» йўналишида эса 3 йил Ўзбекистонда ҳамда 2 йил Россияда таълим олиши белгиланган.
2021–2022-ўқув йили якуни бўйича «Стоматология» йўналишида 46 нафар, «Даволаш иши» йўналишида 40 нафар талаба 3-босқични битириб, 2022 йил 21 август куни Россиянинг Кубан давлат тиббиёт университетига ўқув юрти мутасаддилари бошчилигида юборилган.
25 август куни Кубан давлат тиббиёт университетида «Стоматология» йўналиши бўйича 3-босқичини битирган талабаларидан имтиҳон олинганда 46 нафаридан 25 нафари белгиланган баллни тўплаб, ўқишни давом эттиришга тавсия этилган. Қолган 21 нафар талаба белгиланганидан паст балл жамғаргани учун имтиҳондан ўта олмаган.
Шундан сўнг ушбу талабалар ва уларнинг ота-оналари томонидан билдирилган мурожаат асосида Соғлиқни сақлаш вазирлиги ва Олий ва ўрта махсус таълим вазирлиги Россия томони, жумладан, Кубан давлат тиббиёт университети маъмурияти билан тегишли музокаралар олиб борди. Натижада имтиҳондан ўта олмаган талабалар рус тилини пухта ўрганиш шарти билан ушбу университетда ўқишни давом эттириш имкониятига эга бўлди.
Маълумот ўрнида, ўқишга қабул қилинмаган ушбу ўзбекистонлик талабалар 27 август куни YouTube орқали Шавкат Мирзиёевга мурожаат йўллаган эди. Унда талабалар алдов йўли билан олиб келиниб, Фарғона жамоат саломатлиги тиббиёт институти ректори учрашувда уларга рад жавобини бергани, 20 нафар талаба қабул қилиниб, қолганлар четлатилгани билдирилганди. Шунингдек, 30 август куни ўқишга қабул қилинмаган талабалар ётоқхонадан чиқариб юборилиши ҳам айтиб ўтилганди.
Изоҳ (0)