29 август куни COVAX механизми доирасида Ўзбекистонга 201 600 дона Pfizer болалар учун COVID-19 вакцинаси келтирилди. Бу ҳақда Санитария-эпидемиологик осойишталик ва жамоат саломатлиги хизмати хабар қилди.
Қайд этилишича, Европа Иттифоқи ва Швейция ҳукуматининг ушбу хайрияси Соғлиқни сақлаш вазирлигининг 5—11 ёшли болаларни вакцинация билан қамраб олиш ва мамлакатда COVID-19 нинг янги штаммлари тарқалишининг олдини олиш бўйича саъй-ҳаракатларини қўллаб-қувватлайди.
«Ўзбекистонда болаларни Pfizer вакциналари билан ихтиёрий равишда коронавирус инфекциясига қарши эмлаш халқаро ва миллий экспертларнинг тавсиялари ҳамда аҳоли мурожаатлари асосида тасдиқланган. Бугун олинган 201 600 доза болалар вакцинаси Ўзбекистонда болаларни COVID-19 дан ҳимоя қилишга ёрдам беради», — дейди Санитария-эпидемиологик осойишталик хизмати бошлиғи Баҳодир Юсупалиев.
Бугунги кунга қадар Ўзбекистонга COVAX механизми орқали жами 21,2 миллион доза COVID вакциналари етказилган. Жумладан:
- Astra-Zeneca – 2,15 миллион;
- Moderna – 10,68 миллион;
- Pfizer – 6,62 миллион;
- Sinovac – 1,77 миллион доза.
Изоҳ (0)