Жиззахдаги тўйда куёвнинг 8 нафар дўсти меҳмонни калтаклади

Ижтимоий тармоқда 11 август тунда Жиззах шаҳрининг «Ҳамзаобод» маҳалласидаги автобекатда 20 дан ошиқ безори 4 нафар шахсга тан жароҳати етказгани ҳақида хабар тарқалди. Жиззах вилояти Ички ишлар бошқармаси ҳолатга муносабат билдирди.

Тармоқда тарқалган хабарда тан жароҳати олган шахслар ички ишлар органларига мурожаат қилганларида уларнинг аризалари қабул қилинмагани, шаҳарда безорилар гуруҳи пайдо бўлгани билдирилган.

ИИБнинг қайд этилишича, жанжал ростдан ҳам содир бўлган ва бунинг оқибатида бир нафар фуқаро шифохонада тиббий ёрдам олган.

«Аммо ички ишлар органлари ходимлари томонидан жабрланувчининг аризаси қабул қилинмаганига оид иддаолар ёлғон», — дейилади хабарда.

Жиззах шаҳрининг «Заргарлик» маҳалласида тўй пайти куёвнинг қариндошлари ва дўстлари ўртасида даҳанаки тортишув рўй берган. Тўйдан сўнг куёвнинг бир неча танишлари «Учариқ» маҳалласи ҳудудида сал илгари улар билан гап талашган куёвнинг қариндоши С.К.га тан жароҳати етказган.

Оқибатда жабрланувчи касалхонада биринчи тиббий ёрдам олган. Шифокорлар белгиланган тартиб асосида ҳолатни рўйхатга киритиб, воқеа ҳақида ички ишлар органларига хабар берган. Ўша заҳотиёқ ички ишлар органлари тергов тезкор гуруҳи шифохонага етиб бориб, жабрланувчи билан мулоқот ўтказган ва гумонланувчиларни ички ишлар бўлимига келтириш чоралари кўрилган.

Айни вақтда ҳолат юзасидан Жиззах шаҳри «Раваллиқ» маҳалласида яшовчи С.У., «Оққўрғонлик» маҳалласида яшовчи Ж.М., «Учариқ» маҳалласида яшовчи Б.М., Ф.Э., У.К., Т.О ҳамда муқаддам судланган Т.К., Жиззах шаҳрининг «Маданият» маҳалласида яшовчи А.С.га нисбатан Жиноят кодексининг 277-моддаси (безорилик) 2- қисми «б» банди билан жиноят иши қўзғатилган.