Тошкентда ўз онасини ўлдирган аёлга суд ҳукми ўқилди. Бу ҳақда Тошкент шаҳар судлари матбуот хизмати «Дарё»га хабар берди.
Маълум қилинишича, 70 ёшли Х.Б. (исм-шарифлар ўзгартирилган) 96 ёшни қаршилаган онаси С.С. операция бўлиб чиққандан кейин унга қарайдиган бўлди. Юзга яқинлашган она ҳассасиз юролмас, оғриқ азобидан тун-у кун инграб чиқарди. Бора-бора бу Х.Б.ни чарчатди, асаблари тамом бўлди. Бу хонадондаги бақир-чақирларни қўшнилар ҳам билиб бўлишди.
Бир кун Х.Б. ухлаб ётган онасининг кўкрагига бир неча бор пичоқ санчди. Онасини ўлдириб қўйганини англагач, энди ўзини ўлдириш мақсадида қўлидаги пичоқ билан чап билаги ва бўйнини ҳамда кўкрак қафасларини кесиб ташлади. Бу орада синглиси уйга келиб қолади. Тез тиббий ёрдам чақиртирди.
Жабрланувчи шифокорлар томонидан кўрсатилган бир неча кунлик тиббий ёрдамга қарамасдан вафот этди.
Х.Б.га Жиноят кодекси 97-моддаси 2 қисми «в» банди билан жиноят иши қўзғатилиб, иш судга оширилди.
Суд мажлисида Х.Б.нинг қўшнилари Н.Р., Х.А., Т.А. ва бошқалар судланувчининг яхши аёл бўлгани, турмушга чиқмаса-да, ота-онасига қарагани, меҳрибонлиги, зиёли экани, кейинги пайтда С.С.нинг бақир-чақирларини улар ҳам эшитишганини, унга нисбатан енгил жазо тайинлашни сўрашди.
Судда Х.Б. айбли деб топилди. Жиноят кодексининг 97-моддаси 2-қисми «в» банди билан 15 йил озодликдан маҳрум қилиш жазоси тайинланиб, Жиноят кодексининг 72-моддаси орқали тайинланган жазо шартлига алмаштирилиб, 3 йил синов муддати белгиланди.
Х.Б.га яшаш жойи ўзгарган тақдирда, бу ҳақида унинг хулқи устидан назорат олиб борувчи ички ишлар идораларига хабар бериш ва 1 ойда икки маротаба келиб, бу органларда рўйхатдан ўтиб туриш мажбурияти юклатилди, унга синов муддати давомида ҳукм шартларини бузган тақдирда, Жиноят кодекси 72-моддасининг 6 ва 8-бандида кўрсатилган оқибатлар юзага келиши мумкинлиги тушунтирилди. Х.Б.га нисбатан қўлланилган эҳтиёт чораси ўзгартирилиб, у дарҳол суд залида қамоқдан озод қилинди.
Айни пайтда судланувчи Х.Б. қонунда белгиланган жазони шартли ўтамоқда.
Изоҳ (0)