Самарқандда ҳокимлик захирасидаги 1 гектар ерни 10 минг долларга сотмоқчи бўлган шахс ушланди

Нурободда ноқонуний равишда 1 гектар ер майдонини 10 000 АҚШ долларига сотмоқчи бўлган шахс қўлга олинди.

Самарқанд вилоятидаги ҳуқуқни муҳофаза қилувчи органларга фуқаро ариза билан мурожаат қилган. Унда айтилишича, фуқаро тадбиркорлик билан шуғулланмоқчи бўлиб, блок ишлаб чиқариш цехини қуриш учун ер майдони излаб юрган вақтида, Нуробод туманида яшовчи Т. билан танишиб қолган.

Т. унинг ишончига кириб, Нуробод тумани Меҳнаткаш маҳалласи ҳудудида жойлашган ҳокимлик захирасида бўлган 1 гектар ер майдонини 10 000 АҚШ долларига сотишини ва келгусида туман Кадастр бўлимидаги танишлари орқали ҳужжат расмийлаштириб беришини айтиб, олдиндан 5 000 АҚШ доллари миқдоридаги пулларни талаб қилиб келаётганини маълум қилиб, унга нисбатан қонуний чора кўришни сўраган.

Мазкур аризага асосан, Самарқанд вилояти ИИБ ЖҚБ Коррупция ва иқтисодий жиноятларга қарши курашиш бўлими Ер ресурслари талон-торож қилинишига қарши курашиш бўлинмаси ва вилоят прокуратураси Ер ресурслари талон-торож қилинишини олдини олиш бўлими ходимлари ҳамкорлигида тезкор тадбир ўтказилиб, Т. ариза муаллифидан фирибгарлик йўли билан 5 000 АҚШ доллари миқдоридаги пулларни олган вақтида ашёвий далиллар билан қўлга олинди.

Мазкур ҳолат юзасидан терговга қадар текшириш ҳаракатлари олиб борилмоқда.