Тошкент шаҳри Чилонзор туманида катта дарахтларнинг илдизига шикаст етказилгани юзасидан жиноят иши қўзғатилганди. Давлат экология қўмитаси раиси Назрулло Обломуродов воқеа жойига бориб, ҳолат билан яқиндан танишди.
Қўмита матбуот хизматининг маълум қилишича, Чилонзор кўчасида дарахтларга шикаст етказилганлиги ҳолати юзасидан Давлат экология қўмитаси масъуллари иштирокида ишчи гуруҳ тузилиб, тузилган ишчи гуруҳ аъзолари томонидан ҳудуддаги барча дарахтлар доимий назоратга олинди. Зарарланган дарахтларни сақлаб қолиш ва келгусида бундай ҳолатлар такрорланмаслиги учун мутасаддиларга тегишли топшириқлар берди.
Эслатиб ўтамиз, 6 август куни Чилонзор шоҳкўчасидаги қурилиш ҳудудида 7 та эман дарахтининг томир қисми очилиши оқибатида шикаст етказилгани ҳамда дарахтлар хавф остида қолгани аниқланганди.
Мутахассисларнинг маълумотига кўра, ушбу ҳолатда зудлик билан чоралар кўрилмаган тақдирда шикаст етказилган дарахтлар қуриши оқибатида табиат ва атроф муҳитга 348,9 миллион сўм зарар етказилишига олиб келиши мумкинлиги кўрсатилган.
Шу куни воқеа жойига шаҳар ҳокими Жаҳонгир Ортиқхўжаев етиб борди ва масъулларга лойиҳадаги олти чизиқли автомобиль йўли ўрнига тўрт чизиқли автомобиль йўлини қолдириш, ортиб қолган жойни эса яшил ҳудудга айлантириш топшириқ берди. Жаҳонгир Ортиқхўжаев шаҳар прокурорига ушбу лойиҳада қўйилган хатоликлар учун лойиҳа институтити, қурувчилар, экология бўлими ва, умуман, ушбу лойиҳада қатнашган барча мутасаддиларга чора кўрилиши зарурлигини таъкидлади.
Чилонзор тумани ҳокимлиги матбуот хизматининг маълум қилишича, муаммони жойига чиқиб ўрганган Фанлар академияси ҳузуридаги Ботаника институти мутахассислари дарахтларни асраб қолиш учун йўлнинг ҳар иккала томонининг 3,5 метр қисмини гомусли тупроқ билан тўлдириш, дарахтларга чиришнинг олдини олишда ишлатиладиган фитоспорин микробиологик препаратлари ва илдиз ўстирувчи корневин биостимулятори билан ишлов бериш ҳақида тавсиялар берди.
Шу тавсиялар асосида «Ўзйўлкўкаламзорлаштириш» унитар корхонаси мутахассислари томонидан дарахтларни парваришлаш ишлари бошлаб юборилди. Шунингдек, 140 метр куб соф сариқ тупроқ, 45 метр куб гумус ва 33 метр куб қум олиб келинди ва йўлнинг ҳар икки томонидан дарахтлар учун ажратилган 3,5 метрли ер майдонига мутахассис тавсиясига асосан солинмоқда. Илдизлари зарарланган эман дарахтлари эса етказиб келинган биостимулятор ва препаратлар билан парваришланмоқда.
Мазкур ҳолат юзасидан Жиноят кодексининг 198-моддаси 3-қисми (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилиб, тергов ҳаракатлари олиб борилмоқда.