PMTI экспертлари интернет ва мобил алоқанинг ривожланиши ишсизлик даражасига қандай таъсир этаётганини ҳисоблади. 

Тадқиқот натижаларига кўра, қуйидагилар аниқланди:

• оптик толали интернет узунлигининг 100 км га ошиши ишсизликнинг 0,04 фоиз пунктига қисқаришида ёрдам беради.
• интернет фойдаланувчилари сонининг 1 фоиз пунктига ортиши ишсизликни 0,02 фози пунктига камайтиради.
• 100 та янги уяли алоқа база станциясининг қурилиши ишсизлик даражасини 0,05 фоиз пунктига камайтириш имконини беради.

Ишсизлик ижтимоий тенгсизлик муаммосини янада кучайтиради. Ўсиб бораётган ишсизлик даражаси Аргентина, Европа Иттифоқи, Индонезия, Яқин Шарқ ва Шимолий Африкада тенгсизликнинг кучайишига сабаб бўлди.

АКТ, хусусан, юқори тезликдаги интернет ва мобил алоқанинг ривожланиши қўшимча иш ўринларини яратиш учун янги имкониятларни очмоқда. 

Масалан, ривожланган мамлакатлар тажрибаси шуни кўрсатадики, мобил телефон иловалари кичик ва ўртача катталикдаги корхоналар учун янги имкониятлар яратади.

АКТ бўйича катта билим ва тажрибаси бор одамлар кўпроқ  имкониятга эга ва шунинг учун ишсиз қолиш эҳтимоли камроқ. 

Бундан ташқари, АКТ кўникмалари ишсизларнинг маош миқдори ўртача ва юқори бўлган рақамли касбларга ўтишида ёрдам беради.

Ўзбекистонда АКТнинг ривожланиши ишсизликнинг қисқаришига кучли таъсир қилмаслигини асосан икки омил билан изоҳлаш мумкин:

• юқори тезликдаги интернет асосан йирик шаҳарларда мавжуд ва олис аҳоли пунктларини бутунлай қамраб олмайди.
• рақамли маконда пул ишлаш имконини берувчи компьютер технологияларидан фойдаланиш бўйича кўникмаларнинг етарли даражада эмаслиги.

Аввалроқ ўзбекистонлик меҳнат муҳожирлари учун энг яхши йўналишлар маълум қилинганди.