Бокс бўйича супер оғир вазн тоифасида WBA Regular камари соҳиби британиялик Дэниэл Дюбуа (18-1, 17 КО) америкалик афсонавий промоутер Дон Кинг устидан судга мурожаат қилди, хабар беради BoxingScene.
Айбловчи томоннинг баёнотига кўра, Дюбуа ва америкалик Тревор Брайан (22-1, 15 КО) ўртасидаги жангни ташкиллаштирган Кинг британиялик спортчига ваъда қилинган тўловнинг бир қисмини бермаган. Гап 463,3 минг доллардан 938,2 минг долларгача бўлган пул миқдори ҳақида кетмоқда.
Дюбуанинг жамоаси етти ҳафта мобайнида пулни олишга ҳаракат қилган, бироқ натижа чиқмагач судга мурожаат қилишга мажбур бўлган.
Эслатиб ўтамиз, Дюбуа ва Брайан ўртасидаги жанг 12 июнь куни Майамида бўлиб ўтган. Жангда британиялик спортчи 4-раундда нокаут эвазига ғалаба қозонган. 24 ёшли Дюбуа ўз фаолиятида илк бор жаҳон чемпионига айланди.
Изоҳ (0)