Сергели ва Янгиҳаётда тақиқланган моддалар олиб юрган шахслар аниқланди

Тошкент шаҳри Сергели ва Янгиҳаёт туманида гиёҳванд моддалари олиб юрган шахслар аниқланди.

2022 йил 3 август куни соат 15:30 ларда Сергели тумани ҳудудида хизмат олиб бораётган ЙПХ ходими Т.Тожибоев томонидан Наврўз кўчаси бўйлаб ҳаракатланиб келаётган Lacetti русумли автомобиль тўхтатилган вақтда, салонда бўлган йўловчи кўриниши ва турли хатти-ҳаракатлари билан ходимда шубҳа уйғотган.

Холис ва гувоҳлар иштирокидаги текширувлар давомида, йўловчи, 2003 йилда туғилган К.Н.нинг чўнтагидаги уяли телефоннинг ғилофи орқасидан 2 дона, жигар рангли, ўткир ҳидли, сақичсимон моддалар топилган.

Мазкур ҳолат юзасидан тегишли ҳужжатлар расмийлаштирилиб, фуқаро К.Н. ва топилган модда Сергели тумани ИИО ФМБга топширилган.

Шунингдек, 2022 йил 4 август куни соат 00:10 ларда, Янгиҳаёт туманида жойлашган «А.Турбанов» ЙПХ масканида хизмат олиб бораётган ЙПХ ходимлари Н.Икромов ва М.Пўлатовлар томонидан Тошкент вилоятидан пойтахтга кириб келаётган Matiz русумли автомобиль тўхтатилган вақтда, салонда бўлган йўловчи кўринишидан ходимларда шубҳа уйғотган.

Холис ва гувоҳлар иштирокидаги текширувлар давомида, йўловчи, 1983 йилда туғилган Н.С.нинг чўнтагидан 1000 сўмлик пул купюрасига ўралган, яшил рангли, ўткир ҳидли, қуритилган ўсимлик моддаси топилган.

Мазкур ҳолат юзасидан тегишли ҳужжатлар расмийлаштирилиб, йўловчи Н.С. ва топилган модда Янгиҳаёт тумани ИИО ФМБга топширилган.