Қозоғистонда Курчатов шаҳри яқинида, Иртиш дарёсида атом электр станцияси қурилиши эҳтимоли муҳокама қилинмоқда. Бу ҳақда энергетика вазири ўринбосари Жандос Нурмаганбетов маълум қилди, деб ёзади Tengrinews.

Вазир ўринбосари қайд этишича, мамлакатда АЭС жойлашуви учун истиқболли майдонлар Балхаш кўли ва Иртиш дарёси ҳисобланади.

«Балхаш кўли — Қозоғистондаги биринчи атом станцияси жойлашадиган жой. Агар Қозоғистон углерод нейтраллиги йўлини қабул қилса, бир нечта станцияларни қуришдан бошқа ечим йўқ. Иртиш — шубҳасиз истиқболли майдон. Биринчи станция қурилишининг муваффақиятли тарзда бошланиши билан шундай савол юзага келади: Қозоғистонда нечта атом станцияси бўлади? Бу масалада тегишли муҳокамалар олиб борилмоқда. Ўйлашимча, Қозоғистондаги иккинчи атом станцияси Иртишда, Курчатов шаҳри ҳудудида пайдо бўлиши эҳтимолдан йироқ эмас… Шу йил охири — келаси йил бошида биз тегишли ахборотни киритамиз», — деди Жандос Нурмаганбетов матбуот анжуманида.

Аввалроқ Қозоғистонда биринчи атом электр станцияси 2035 йилда ишга туширилиши мумкинлиги маълум қилинган эди.