«Барселона» 2022/23 йилги мавсумда 1,3 миллиард евро даромад қилмоқчи. Унинг деярли ярми маошларга сарфланади

«Барселона» 2022/23 йилги мавсумда 1,3 миллиард евро даромад қилмоқчи. Каталонияликлар молиявий барқарорликка эришишни мақсад қилган

Diario Sport нашрининг хабар беришича, директорлар кенгаши иқтисодий прогнозларни тайёрлаган. Унга кўра, телевизион ҳуқуқларнинг яна 15 фоизини Sixth Street компаниясига ўтказиш 400 миллион евро олиб келади, Barca Studios’нинг 24,5 фоиз улушини «Socios.com»га сотиш эса 100 миллион даромад қилишга ёрдам беради.

Яна 800 миллион евро клубнинг одатий фаолиятидан тушади.

Мавсум учун харажатлар 900 миллион евро бўлиб, унинг 620 миллион футболчилар ва ходимларнинг маошини тўлашга кетади.

Шу тариқа каталонияликлар 2022/23 йилги мавсум якунига 400 миллион евро фойда олишни кўзламоқда.

Аввалроқ «кўк-анорранглилар» Sixth Street компаниясига Ла Лига ўйинлари телеҳуқуқининг 25 фоизини 25 йилга бергани хабар қилинганди. Ушбу келишув натижасида «Барселона» 550—600 миллион еврогача даромад қилади. Шунингдек, Barca Studios’нинг 25% улушини сотиш орқали 100 миллион евро ишлаган.