Тошкентда 8-синф ўқувчиси билан жинсий алоқа қилган уч эркак муддатидан илгари шартли равишда озод этилди. Бу ҳақда Telegram’даги «Nemolchi.uz» лойиҳаси хабар берди.
Эслатиб ўтамиз, 2021 йилнинг 27 апрелида 8-синф ўқувчиси дастлаб 1991 йилда туғилган А.Х. томонидан, кейинчалик унинг икки таниши — М.М. ва Б.Г. томонидан жинсий турдаги жиноят содир этилгани бўйича 30 апрель куни Жиноят кодексининг 128-моддаси (ўн олти ёшга тўлмаган шахс билан жинсий алоқа қилиш) бўйича жиноят иши қўзғатилиб, гумонланувчилар қўлга олиниб, уларнинг иши судга оширилганди.
11 ноябрь куни эълон қилинган суд ҳукмига кўра, фуқаро А.Х. Жиноят кодексининг 128-моддаси (ўн олти ёшга тўлмаган шахс билан жинсий алоқа қилиш) 2-қисми «а» бандида назарда тутилган жиноятни содир этганликда айбли деб топилиб, 4 йил муддатга, Б.Г. ва М.М. эса Жиноят кодексининг 128-моддаси 1-қисмида назарда тутилган жиноятни содир этганликда айбли деб топилиб, 2 йил муддатга озодликдан маҳрум қилинганди.
«Nemolchi.uz»да айтилишича, улардан икки нафари атиги ярим йил қамоқда ўтириб чиқди. Асосий ташаббускор, собиқ жисмоний тарбия ўқитувчиси эса қамалганидан 12 ой ўтиб озодликка чиқди. Судланганлардан бири айни дамда тиббиёт марказида регистратор бўлиб ишламоқда, марказда, хусусан, болаларга ҳам тиббий хизмат кўрсатилади.
Лойиҳа сўровига асосан Бош прокуратура матбуот котиби берган маълумотга кўра, мактабда ўқитувчи бўлиб ишлаган Х.А.га (1991 йилда туғилган) Жиноят ишлари бўйича Зангиота туман судининг 2022 йил 7 майдаги ажрмига кўра, ўталмай қолган 2 йил 11 ой 27 кун озодликдан маҳрум қилиш жазоси Жиноят кодексининг 74-моддасига асосан шу муддатга ойлик иш ҳақининг 20 фоизини давлат даромади ҳисобига ушлаб қолган холда аҳлоқ тузатиш ишлари жазосига алмаштирилган.
Унинг дўсти, Г.Б. (1993 йилда туғилган) ва М.М.га эса (1994 йилда туғилган) эса Жиноят ишлари бўйича Оҳангарон туман судининг 12 майдаги ажрмига кўра, ўталмай қолган 1 йил 5 ой 29 кун озодликдан маҳрум қилиш жазоси Жиноят кодексининг 74-моддасига асосан шу муддатга ойлик иш ҳақининг 15 фоизини давлат даромади ҳисобига ушлаб қолган холда аҳлоқ тузатиш ишлари жазосига алмаштирилган.
Изоҳ (0)