Қашқадарё вилоятининг Косон туманида аёл ухлаб ётган эри бошига темир жисм билан уриб ўлдирди. Бу ҳақда вилоят ИИБ матбуот хизмати хабар берди.
Маълум бўлишича, Косон тумани «Яккасарой» маҳалла фуқаролар йиғинида яшовчи фуқаро Б.П. шаърий никоҳ асосида бирга яшовчи турмуш ўртоғи Р.Х.га уйининг ёнидаги ер майдонига экилган тарвуз ва маккажўхори даласини қўриқлашни буюрса-да, далага тез-тез чорва молларини кириб, далани пайҳон қилаётганини рўкач қилиб, аёлни далага қарамаганликда айблаб келган.
Ҳолат содир бўлган кун яъни, 10 июлда эри уйда соғлигини тиклаш учун даволанаётган бўлишига қарамасдан яна турмуш ўртоғи Р.Х.ни турли рўзғор ишларини бажармаганликда айблаб, оғзаки урушган. Натижада тоқати тоқ бўлган хотин эри уйда ухлаб ётганидан фойдаланиб, тўмтоқ темир жисм билан унинг бошига уриб, ўта оғир тан жароҳати етказиб, ўлдириб қўйган.
Қайд этилишича, мазкур ҳолат юзасидан Косон туман прокуратураси томонидан жиноят иши қўзғатилиб, тергов ҳаркатлари олиб борилмоқда.
Изоҳ (0)