Наманганда почта хизмати мансабдорлари фуқароларнинг алимент пуллари, газеталар обунаси ва коммунал тўловлардан тушган пулларни ўзлаштиргани аниқланди

Наманганда почта тизимида йирик талон-торожликлар аниқланди, деб хабар бермоқда ЎзА.

Маълум қилинишича, ДХХ Наманган вилояти бўйича бошқармаси ҳамда Бош прокуратура ҳузуридаги Иқтисодий жиноятларга қарши курашиш департаменти Наманган вилояти бошқармаси ҳамкорлигида суриштирувлар олиб борилган.

Суриштирувлар давомида «Ўзбекистон почтаси» акциядорлик жамиятининг Наманган филиали Чортоқ тумани почта алоқа боғламаси собиқ бош ҳисобчиси Т.Н. (1975 йилда туғилган) ва ташкилотнинг бошқа мансабдор шахслари томонидан 529 миллион сўм пул маблағлари ўзлаштирилгани аниқланган.

Улар фуқароларнинг алимент пуллари, почта хизматлари кўрсатилишидан тушган даромадлар, матбуот нашрлари обунаси ва коммунал тўловлардан тушган маблағларни ўз шахсий пластик карталарига ноқонуний равишда ўтказиш, конверт-марка маҳсулотларини ноқонуний сотиш ҳамда ортиқча иш ҳақлари ҳисоблаш орқали жуда кўп миқдордаги ўзгаларнинг маблағларини ўзлаштириш йўли билан талон-торож қилган.

Ҳозирда Т.Н. ва бошқаларга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди билан жиноят иши қўзғатилиб, тергов ҳаракатлари олиб борилмоқда.