Тошкентда аёл собиқ севгилиси томонидан таҳдидларга учраётганини маълум қилганди. Пойтахт ички ишлар бош бошқармаси ҳолат юзасидан расмий маълумот берди.
Таъкидланишича, ижтимоий тармоқларда аёл киши собиқ фуқаровий турмуш ўртоғи томонидан калтаклангани ҳақидаги хабар тарқалиб, кўплаб муҳокамаларга сабаб бўлмоқда. Ҳолат юзасидан фуқаро Г.М.нинг мурожаати асосида Юнусобод тумани ИИО ФМБ томонидан терговга қадар текширув ўтказилмоқда.
Текширув жараёнида Г.М.нинг мурожаатида кўрсатилган барча ҳолатлар тўлиқ ўрганилади ва якуни бўйича қонуний қарор қабул қилинииш таъминланади.
Аёлнинг айтишича, бу бўйича ҳуқуқни муҳофаза органларига бир неча бор ариза билан чиққан, лекин эркакнинг катта жойда ишлайдиган танишлари борлиги учун бу ҳеч қандай натижа бермаган.
Маълумот учун, аёл қуйидагича мурожаат ёзиб қолдирган эди.
Кимга мурожаат қилишни билмай сизга (Nemolchi.uz’га – таҳр.) ўзим билан бўлган воқеани айтмоқчиман. Мен «На Чиле» ресторанининг эгаси Ойбек Исабаев Бахтиярович билан фуқаролик никоҳида эдим. Менинг ундан 3 ёшли қизим бор. Шу йиллар давомида маънавий ва жисмоний зўравонликка дучор бўлдим, калтакландим, хўрландим.
Лекин мен ундан узоқлаша олмадим, чунки Ойбек мени орқамдан тинмай таъқиб қиларди. Мен бир неча марта ИИБга мурожаат қилдим, лекин у ҳамма нарсани пул ва танишлари билан ҳал қилди.
Олти ой олдин биз алоҳида яшай бошладик, чунки у ўзига бошқа аёлни топиб олганди. Шундан сўнг мен бу одамдан қутулдим деб ўйлагандим, хато ўйлаган эканман. Аввалги зўравонликлар баттар ёмонлашди.
Бу эркак машинамга GPS қўйиб олиб, таъқиб қилади. Бошқа аёл билан яшаб, мени боламнинг кўз ўнгида калтаклайди, ҳақорат қилади, хўрлайди, мулкимни талон-торож қилади. У мени дўқ-пўписалар билан манипуляция қилиб, ўлдираман, сочингни қирдираман, дейди.
Менда сизлардан бошқа мурожаат қиладиган бошқа ҳеч ким йўқ. Менинг отам йўқ, ёрдам берадиган бирон танишим йўқ. Менга раҳм қиладиган ҳеч ким йўқ... Ҳозир у мени қўрқитишда давом этмоқда. Кеча у машинамни расво қилди, ундан олдин телефонимни синдириб ташлади.
Мен ёлғиз онаман, онам ва болам билан яшайман, оиламни ўзим таъминлайман. Кеча мен ИИБ ходимига ариза билан мурожаат қилдим. Аммо ҳалигача ҳеч ким менга қўнғироқ қилмади. Илтимос ёрдам беринг!» – дейди мурожаатчи аёл.
Изоҳ (0)