Ўзбекистонда йил бошидан бери биринчи марта дефляция қайд этилди. Бу нимани англатади?

Ўзбекистонда июль ойида 0,1 фоизлик дефляция қайд этилди. Бу ҳақда Давлат статистика қўмитаси ҳисоботида маълум қилинган.

Дефляция — нархларнинг пасайиши ва миллий валютанинг харид қобилиятини ошириш жараёни.

Инфляция товарлар ва хизматлар нархи кўтарилганда, дефляция эса бу нархлар пасайганда содир бўлади. Икки иқтисодий шарт ўртасидаги мувозанат жуда нозик ва иқтисодиёт тезда бир ҳолатдан иккинчисига ўтиши мумкин.

Йил бошидан буён инфляция 6,4​​ фоизни, йиллик нисбатда эса 12,3 фоизни ташкил этди. Июнь ойида инфляция 0,9 фоиз эди.

Ўзбекистонда июнь июль ойларида дефляция одатда доимий содир бўлади. Сабаб — озиқ-овқат маҳсулотлари нархларининг пасайиши. Июлда улар ой давомида 1 фоизга арзонлашди.

Бундан ташқари ўтган ойда ноозиқ-овқат маҳсулотлари ўртача 0,9 фоизга, хизматлар эса 0,3 фоизга қимматлашди.

Марказий банк 2022 йилда инфляция 12-14 фоизга етишини прогноз қилган. Таққослаш учун, 2021 йилда у 9,9 фоизни ташкил қилган эди.

Аввалроқ Марказий банк Ўзбекистондаги нархлар билан боғлиқ вазиятни тушунтирган эди.