Сирдарё ва Фарғона вилоятларида ўқишга киритиб қўйиш ва ўқишни кўчириб бериш билан боғлиқ фирибгарлик ҳолатлари фош этилди, деб хабар беради Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департамент ҳамда ДХХнинг Янгиер шаҳар бўлимлари томонидан тезкор тадбир ўтказилган. Унда фуқаро Ф.Х. бошқа бир фуқаро М.ни гўёки юқори лавозимдаги танишлари ёрдамида Ўзбекистон Миллий университетига ўқишга киритиб қўйишни ваъда қилгани аниқланган. У такси хизмати ҳайдовчиси С.С. орқали 2 500 долларни олган вақтида ашёвий далиллар билан ушланган.
Шунингдек, департамент ҳамда ДХХнинг Фарғона вилояти бошқармалари томонидан тезкор тадбир ўтказилган. Унда фуқаро Х.А. бошқа бир фуқаро М.нинг қўшни Қирғизистон университетидаги ўқишини Фарғона давлат университетига кўчириб беришини айтгани аниқланган. Бунинг эвазига 1 200 долларини олган вақтида ашёвий далиллар билан ушланган.
Ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)