Бугун,

  • USD 10940.05
  • RUB 182.26
  • EUR 11121.65

Қашқадарё вилоятининг Қарши шаҳрида банк раҳбари кредит олиш ниятида борган фуқародан тириклигини исботловчи ҳужжат сўрагани айтилмоқда. Бу ҳақда Telegram’даги «Қитмир мухбир» каналида хабар берилган.

Маълум бўлишича, фуқаро Анвар Жавҳаров Қарши шаҳар прокурори, иккинчи сектор раҳбари таклифи билан «Агробанк»нинг Қарши шаҳар бўлимига бориб, кредит олиш нияти борлигини маълум қилган.

Анвар Жавҳаров.

Анвар Жавҳаров.
Фото: Видеодан скриншот

«Барча ҳужжатларим тўғри экан. Шу сабаб бошлиқнинг олдига киринг, дейишди. Кирсам, банк раҳбари мендан барча маълумотларни сўради. Ҳужжатларим тўғрилигини айтди. Ва ‘энди ака ўзингизнинг тириклигингизни исботловчи ‘справка’ олиб келинг, деди. Бу гап менинг миямга чиқиб кетди. Мен билан гаплашиб турган раҳбар менинг тириклигимга ишонмай, буни исботловчи ‘справка’ олиб келинг деяпти. Айтинг-чи, менга менинг тириклигимни исботловчи ҳужжатни ким беради?», — дейди видеомурожаат қилган мурожаатчи.

«Дарё» мухбири билан бу ҳақда суҳбатлашган Марказий банкнинг вилоят бошқармаси масъуллари фуқародан шу мазмундаги маълумотнома сўралганини тасдиқлади.

«Банкнинг кредит ахборотлар базасида бу инсон анча йил аввал вафот этгани қайд қилинган бўлган. Шу боис банк масъули ундан тириклигини исботловчи ҳужжат сўраган бўлиши мумкин. Ҳолат батафсил ўрганилади», — дейди «Дарё» мухбири билан суҳбатда бўлган масъуллардан бири.

Эслатиб ўтамиз, «Дарё»да ўзининг тириклигини исботлашга уринаётган Анвар Жавҳаров ҳақида мақола эълон қилинганди. Мақолада расман 1998 йилда «ўлган» қашқадарёлик адолат излаётгани, тириклигини исботлашга уринаётгани маълум қилинганди. Айнан шу фуқаро кейинчалик нотариус ҳамда шаҳар прокурорини обрўсизлантириш, уларга туҳмат қилганликда айбланиб, суд қилинганди.

Изоҳ
Асосий янгиликлар