Нега мактаб ва лицейни битирган кўп ёшлар бирор хорижий тилни яхши ўрганиб чиқмайди? Иқтисодиёт университети ректори Қўнғиротбой Шарипов «Дарё» нашрига берган интервьюсида мазкур масалада фикрларини билдирди.
Қўнғиротбой Шариповнинг айтишича, бунга бир қанча омиллар таъсир кўрсатади.
«Болалар 9 ёки 10 йил мактабда, кейин 3 йил лицейда ўқийди. Лекин нега улар инглиз тили ёки немис тилини билиб чиқмайди? Чунки боланинг ўзида мотивация бўлмаса, у ҳеч қачон тилни ўрганмайди. Бола ёшликдан бирор тилни ўрганишга қизиқиб, келажакда шундай мақсадим бор, халқаро университетга кираман, деб ҳаракат қилса, ота-она фарзанди билан тенг ишлаши керак бўлади. Ана шундагина бола тил ўрганади. Лекин афсус, кўп ёшларимиз, ҳатто 90-95 фоиз болалар мактаблардан тил ўрганмасдан чиқади. Мен методикани жуда нотўғри деб айтмайман. Дарслар бутун дунёда тан олинган ва бир хил ўтилади. Асосий фарқ нимада? Чет элларда талаба 4 соат аудиторияда ўқиса, ундан кейин 6 соат уйида ўқийди. Яъни ўқувчи ўз устида ишлаши керак.
Биз фақат мактабдаги материал билан чекланамиз-да, ўзимизнинг устимизда ишламаймиз. Энг катта айбимиз шу. Мустақил таълим деган тизим бизда деярли ишламайди. Талаба ўзининг устида ишламайди. Чет элдаги бирор университетга борсангиз, талабалар доим кутубхонада ўтирган бўлади. Афсуски, бизнинг университетларга кирсангиз, кутубхонада талабалар жуда кам бўлади. Сабаби биз ҳали ҳам мустақил таълимни тўғри ташкил эта олмаяпмиз. Талаба шунақа ўқиши керакки, ўқитувчи берган материални тўлиқ ўзлаштирса ҳам, имтиҳондан ўтолмаслиги лозим. Чунки бу ерда 40 фоиз материал болага аудиторияда бериляпти. Қолган 60 фоиз материални ўзи ўзлаштирмаса, баҳоси 3 га ҳам торта олмайди. Талаба ёки мактабдаги ўқувчиларнинг ўз устида ишлаши ўқитувчи томонидан ташкил этилса, мустақил таълим ва имтиҳонда натижалар кўринади. Имтиҳон пайт бизнинг бир айбимиз — кўнглимиз бўш. Э, бу дарсга келди-ку, деб баҳосини қўйиб бераверамиз. Бошқа давлатларда унақа эмас. Ўқишдан ҳайдаб юборади», — деди университет ректори.
Аввалроқ сайтимизда Қўнғиротбой Шарипов билан интервьюнинг тўлиқ шакли эълон қилинганди.