Фарғона вилоятининг Марғилон шаҳрида яшовчи фуқаро С.Т. икки нафар вояга етмаган фарзандининг моддий таъминоти учун ундирилиши белгиланган алимент ўрнига уй совға қилди, деб хабар берди «Дарё» мухбири.

МИБ Фарғона вилояти бошқармасининг маълум қилишича, фуқаролик ишлари бўйича Марғилон туманлараро судининг 2021 йил 23 апрелдаги ижро ҳужжатига асосан қарздор С.Т.дан ундирувчи С.Т. фойдасига икки нафар вояга етмаган фарзандининг моддий таъминоти учун алимент ундирилиши белгиланган. Бироқ қарздор алиментдан бўлган қарзларини тўлиқ тўламай келган.

Жорий йилнинг 7 июль куни ўзаро келишувга асосан С.Т. вояга етмаган икки нафар фарзандининг моддий таъминоти учун улар 18 ёшга тўлгунига қадар тўлаши лозим бўлган 90 миллион 132 минг сўм алимент маблағлари ўрнига ўз номидаги хонадонни нотариус орқали расмийлаштириб берган.

Ундирувчи аризаси билан ушбу ижро ҳужжатининг иш юритуви тамомланган.