Тошкент шаҳрида 60 фоиз: Ўзбекистонда ҳудудлар бўйича берилган банк кредитлари маълум бўлди

Марказий банк жорий йил биринчи ярим йиллик якунларига кўра банк тизими кредит портфели тўғрисида ҳудудлар кесимида маълумотни тақдим этди.

Банк тизими кредит портфели бу — банк томонидан берилган барча фаол кредитлар йиғиндиси.

Маълумотларга кўра, 2022 йилнинг ярмида банк тизими жами кредит портфели 343,6 трлн сўмни ташкил қилиб, ўтган йилнинг биринчи ярми якунига нисбатан 43,1 трлн сўмга ўсган. 

Ўсиш фақат Тошкент шаҳри ҳисобига юз берди — 63,4 трлн сўм. Қолган барча ҳудудларда кредит портфели ҳажми камайиши юз берган. 

Тошкент шаҳрининг Ўзбекистон кредит портфелидаги улуши ўтган йилнинг мос даврига нисбатан 47,2 фоиздан 59,7 фоизга ошиб кетган.

Суммада энг кўп пасайиш қайд этилган ҳудуд Қашқадарё (-2,2 трлн сўм) бўлган бўлса, фоизда Навоий (-18,6 фоиз) бўлди.