2022 йилнинг 18 июлида UzAuto Motors АЖ Асака шаҳридаги заводида Chevrolet Tracker-2023 автомобилини ишлаб чиқаришни бошлади. Бу ҳақда «Дарё» мухбири хабар қилди.

Ўзбекистон Республикаси раҳбарининг топшириғига биноан компаниянинг бошқарув ва ишлаб чиқаришни босқичма-босқич ўзгартириш ишлари доирасида, ягона платформадаги автомобиль моделларини ишлаб чиқаришни йўлга қўйиш амалга оширилди. Ушбу босқичда платформанинг ишлаб чиқариш қуввати йилига 80 000 дона Chevrolet Tracker автомобилини ташкил этади.

Ушбу лойиҳани амалга ошириш жараёнида Асака заводида лазер ва плазмали пайвандлаш, кузовни лазер билан ўлчаш каби янги технологиялар ўзлаштирилди, шунингдек, завод ва бутловчи қисмларни етказиб берувчиларда ишлаб чиқариш жараёнларини модернизация қилиш бўйича кенг кўламли ишлар амалга оширилди.

Бундан ташқари, UzAuto Motors Powertrain заводида Chevrolet Tracker автомобилларини жиҳозлашда фойдаланиладиган замонавий ва тежамкор 1,2 ҳажмли, уч цилиндрли CSS Prime турбодвигателларни ишлаб чиқариш ўзлаштирилди. Янги двигатель Хитойдан олиб келинадиган 125 от кучига эга Tracker автомобиллари двигателидан кучлироқдир. Янги Tracker қуввати 132 от кучига эга.

«Бугун биз барчамиз тарихий ва унутилмас воқеанинг гувоҳи бўлдик –UzAuto Motors компанияси Chevrolet Tracker замонавий автомобилини тўлиқ циклда ишлаб чиқарувчилардан бирига айланди. Бу фақат бошланиши. Компания бундан буён автомобиллар қаторини замонавий ва талабгир автомобиллар билан тўлдиради. Буларнинг барчаси мамлакатимиз раҳбарияти ва General Motors компаниясининг ҳар томонлама кўмаги ҳамда бутун саноат ходимларининг, жумладан, «Ўзавтосаноат», UzAuto Motors АЖ, маҳаллийлаштириш корхоналари ва ишлаб чиқаришни йўлга қўйишда иштирок этаётган бошқа кўплаб таркибий корхона ходимларининг қўллаб қувватлаши туфайли амалга оширилди», – дея таъкидлади «Ўзавтосаноат» АЖ бошқарув раиси Шавкат Умурзоқов.

GM президенти ва стратегик бозорлар, альянслар ва дистрибюторлар бўйича бошқарувчи директори Кристиан Соммер ва GM International глобал таъминот ва таъминот тизими вице-президенти Жонни Салдана ўз нутқида, General Motors раҳбарияти номидан жамоани янги модель ишлаб чиқаришни бошлаганлиги билан табриклади.

«Chevrolet Tracker 2023 йил модели ишлаб чиқарилишини йўлга қўйиш – Ўзбекистонда ва яна, компонентларнинг катта қисми маҳаллий ишлаб чиқарувчилар томонидан қопланадиган, Ўзбекистон ва МДҲ бозорларида сотиладиган GEM платформасида янги авлод автомобиллари ишлаб чиқарилишининг бошланишидир. Альянс доирасида, биз GEM Tracker-ни ўз вақтида ва бенуқсон ишга туширишни таъминлашда техник томондан кўмаклашишдан ҳамда тажрибамиз билан ўртоқлашиш имкониятидан мамнунмиз. Биз кейинчалик ҳам эҳтиёт қисмларни ишлаб чиқариш ва етказиб беришда кўмаклашишда давом этамиз», – деди GM International глобал харид ва таъминот занжири вице-президенти Жонни Салдана.

Chevrolet Tracker-2023 техник хусусиятларининг муҳим жиҳатлари қуйидагилардан иборат:

• 1,2 ҳажмли, айланма ҳаракатда 190 Нм ва 97 кW қувватга эга замонавий уч цилиндрли CSS Prime турбомотор;
• 6-поғонали автоматик узатмалар қутиси;
• аралаш силкда тежамкор ёқилғи сарфи 6,9 л/100 км, шаҳар ташқарисидаги йўлда ҳаракатланиш- 5,6 л/100 км;
• хавфсизликни таъминлаш тизими (паст тезликда автоматик тормозлаш, кўриниши чекланган жойлар мониторинги, фаол фавқулодда тормозлаш, олдинда турган тўсиқлар ҳақида огоҳлантирувчи сигнализация, яримавтомат (параллел) тўхташ тизими;
• ҳароратни автоматик назорат қилувчи тизим (Климат контрол);
• круиз-контрол;
• калитсиз салонга кириш ва двигателни ишга тушириш;
• чармдан рул қоплами;
• электр механизмга эга ҳайдовчи ўриндиғи;
• эко-чармдан ўриндиқлар қопламалари;
• симсиз зарядлаш;
• тўлиқ светодиод оптикаси ва LED орқа габарит чироқлар ва ҳ.к.