Бош прокуратура томонидан мутасадди идоралар билан биргаликда Волейбол федерациясида бюджетдан ажратилган маблағларнинг мақсадли ишлатилиши ўрганилди. Бу ҳақда Бош прокуратура ахборот хизмати хабар қилди.
Қайд этилишича, ўрганиш натижасида федерация мансабдор шахслари ва бошқалар бюджет маблағларини жуда кўп миқдорда талон-торож қилгани аниқланган. Хусусан, собиқ Жисмоний тарбия ва спорт вазирининг буйруғига асосан, федерацияга 54 нафар спортчи билан 23 кунлик ўқув-машғулот йиғини ўтказиш учун бюджетдан 445 миллион сўм ажратилган. Аммо амалда 10 кун ўқув-машғулот йиғини ўтказилиб, 231 миллион сўм бюджет маблағлари ўзлаштирилган.
Бундан ташқари, терма жамоа ва унинг захираси таркибига киритилмаган 29 нафар спортчини турли спорт йиғинларига юборилган. Бунинг оқибатида 75 миллион сўм маблағ асоссиз сарфланган.
Терговга қадар текширув давомида бюджетга етказилган зарарнинг 120 миллион сўми қопланиши таъминланган.
Ҳолатлар бўйича жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ (0)