«Барселона» Роберт Левандовски борасида «Бавария» билан келишувга эришди

Роберт Левандовски «Бавария»дан «Барселона»га ўтади.

Клублар 33 ёшли польшалик ҳужумчининг трансфери борасида келишиб олди. Каталонияликлар Роберт учун 45 миллион евро ва 5 миллион қўшимча бонус сифатида тўлаб беради, дея ёзмоқда Жанлука ди Марцио.

Левандовски «кўк-анорранглилар» билан бир йилга узайтириш ҳуқуқи билан 2025 йилга қадар мўлжалланган шартнома имзолайди.

Футболчи якшанба куни бўлиб ўтадиган «Бавария» тақдимот маросимида иштирок этмайди. У Барселонага йўл олади ва янги жамоаси билан АҚШдаги турнега жўнаб кетади.

Кристиан Фалкнинг хабарига кўра, жума куни «Барселона» Левандовски учун 3 та таклиф билдирган: биринчиси — 40+10 миллион евро, иккинчиси — 45 миллион, учинчиси — 45+5 миллион.

Левандовски «Бавария»даги 8 мавсуми давомида 375 ўйинда 344 та гол ва 72 та голли узатмага муаллифлик қилди.