«Барселона» ва «Атлетико» собиқ ҳужумчиси Луис Суарес фаолиятини Италияда давом эттириши мумкин.
35 ёшли ҳужумчи «Милан» билан шартнома тузишга яқин. Уругвайлик учун «Монца» ҳам курашга қўшилди.
Италия клублари Суаресга йилига 4 миллион евро маош ваъда қилмоқда, дея хабар беради АS.
Агент Марко Кирдемир Луиснинг келажаги ҳақида гапирди: «Суарес учун таклифларни кўриб чиқяпман ва доимо у билан алоқада бўлиб турибман. Шунинг учун у қандай таклифлар олаётганидан хабарим бор. ‘Фенербаҳче’ тўғридан-тўғри футболчининг ўзига алоқага чиқиб, 6 миллион евро маош ваъда қилган. Аммо Луис уни рад этган.
У Италияда ўйнамоқчи. А Сериядан 2 та таклиф бор, бири «Монца»дан. Клуб Суаресга йилига 4 миллион евро бермоқчи. Аммо унинг имиж ҳуқуқлари қиммат туради, шунинг учун маош ҳам баланд бўлиши зарур».
«Милан»нинг собиқ хўжайини Силвио Берлускони 2018 йилдан буён «Монца»га эгалик қилади.
Суарес мавсум сўнгида эркин агент сифатида «Атлетико»ни тарк этди.
Маълумот учун, 35 ёшли ҳужумчи 2021/22 йилги мавсумда барча мусобақалар доирасида 45 та ўйин ўтказиб, 13 та гол ва 2 та голли узатмага муаллифлик қилди.
Изоҳ (0)