Бирлашган Миллатлар Ташкилоти бош котиби Антониу Гутерриш Шри-Ланкада ҳокимиятнинг босқичма-босқич топширилишини таъминлаш учун мулоқотга чақирди. Унинг сўзлари БМТ сайтида келтирилган.
«У Шри-Ланка халқига бирдамлик кўрсатиб, барча манфаатдор томонларни ҳокимиятнинг силлиқ топширилишини таъминлаш ва иқтисодий инқирозга барқарор ечим топиш учун мулоқотга чақиради», — дейилади баёнотда.
Гутерриш зўравонликларни қоралашини ва айбдорларнинг жавобгарликка тортилиши тарафдори эканини қўшимча қилди. Бош котиб мамлакат тинчлигини сақлашни муҳим вазифа деб атади.
Шри-Ланкада иқтисодий муаммолар кучайгани сабабли норозилик намойишлари баҳорда бошланган. 9 июль куни намойишчилар президент Готабай Ражапаксанинг расмий қароргоҳини эгаллаб олди ва бош вазир Ранил Викрамасингхнинг шахсий уйига ўт қўйди. Маҳаллий оммавий ахборот воситаларининг хабар беришича, камида 45 намойишчи жароҳат олган.
Ражапакса ва Викрамасингх ўз лавозимларини тарк этишга рози бўлди. Улар билан бирга беш вазир ҳам кетишга қарор қилди.
Парламент спикери Маҳинда Япа Абейварденанинг айтишича, давлат раҳбари 13 июль куни истеъфога чиқади, шундан сўнг Абейварденанинг ўзи муваққат президент бўлади. Бош вазир эса янги умумпартиявий ҳукумат тузилганидан кейин ўз лавозимини тарк этади.
Намойишчилар президент ва ҳукумат истеъфога чиқмагунча давлат раҳбарининг қароргоҳини тарк этишдан бош тортди.
Изоҳ (0)