Аввалроқ ижтимоий тармоқларда айрим банкларда нақд пул ечиш бўйича комиссия тўловлари 3 фоизгача оширилгани ҳақида хабарлар тарқалган эди. Марказий банк бунга муносабат билдирди.
2022 йилнинг 11 июль куни тушликдан кейин ижтимоий тармоқларда айрим банкоматлардан нақд пул ечишда ечилаётган нақд пул миқдоридан келиб чиқиб 3 фоизгача комиссия тўловлари олинаётганлиги тўғрисида хабарлар тарқалди.
Марказий банк ушбу ҳолат юзасидан қуйидагиларни маълум қилади:
Байрам кунлари муносабати билан Ўзбекистон ҳудудидаги 9,5 мингдан ортиқ банкоматларнинг узлуксиз ишлаши ва етарли миқдорда нақд пуллар билан таъминлаш чоралари кўрилган.
Банкоматлардан нақд пул ечиш учун комиссия тўловлари банклар томонидан банкоматга хизмат кўрсатиш харажатларидан келиб чиқиб мустақил белгиланади ва бугунги кунда 1 фоиздан ошмайди.
Айрим банклар томонидан алоҳида бир банкоматда эксперимент тариқасида табақалашган юқори комиссия тўлови ўрнатилган бўлса, эркин бозор шароитида бу ўзини оқламайди, — дейди Марказий банк.
Чунки бошқа банкоматларда комиссия тўлови 1 фоиз ёки ундан паст қилиб белгиланганлиги сабабли истеъмолчилар арзонроқ хизматдан фойдаланишни афзал кўради.
Марказий банк ижтимоий тармоқ фойдаланувчиларидан маълумотларни тарқатишда уларнинг ҳақиқийлигини ва тизимдаги хизматлар кўламига таъсирини инобатга олишни сўраган.
Изоҳ (0)