АҚШ Давлат котиби Энтони Блинкен Япония собиқ бош вазири Синдзо Абэнинг фожиали ўлими муносабати билан Япония етакчилари ва халқига ҳамдардлик билдириш учун келаси ҳафта Японияга ташриф буюради. Бу ҳақда Давлат департаментининг баёнотига таяниб, «Интерфакс» хабар берди.
«Котиб Блинкен Токиога сафар қилиб, собиқ бош вазир Синдзо Абэ вафоти муносабати билан япон халқига ҳамдардлик билдиради ва Япониянинг юқори мартабали расмийлари билан учрашади», — дейилади департамент матбуот котиби Нед Прайснинг баёнотида.
Дипломатнинг қайд этишича, «АҚШ—Япония иттифоқи Ҳинд—Тинч океани минтақасида тинчлик ва барқарорликнинг тамал тоши ҳисобланади, у ҳеч қачон ҳозиргидек кучли бўлмаган».
Абенинг дафн маросими 12 июлга белгиланган. У 8 июль куни митингда нутқ сўзлаётган пайтда отиб кетилди ва шифокорларнинг уринишларига қарамай вафот этди.
Блинкен ҳозир Таиландда бўлиб турибди. У Индонезиянинг Бали оролидаги G20 мамлакатлари ташқи ишлар вазирларининг йиғилишида иштирок этганидан сўнг Таиландга ташриф буюрган.
Эслатиб ўтамиз, 8 июль куни Шавкат Мирзиёев Синдзо Абэ вафоти муносабати билан Япония императори ва бош вазирига ҳамдардлик йўллади.
Изоҳ (0)