АҚШ президенти Жо Байден The Washington Post газетасига ёзган мақоласида кўпчилик унинг Саудия Арабистонига бўлажак сафарини танқид қилаётган бўлса-да, бу Россияга қарши туриш нуқтаи назаридан муҳим эканини қайд этди.
«Президент сифатидаги вазифам мамлакатимизни кучли ва хавфсиз қилишдир. Биз Россия агрессиясига қарши туришимиз, Хитойдан ўзиб кетиш учун ўзимизни энг яхши ҳолатга қўйишимиз ҳамда дунёнинг муҳим минтақасида барқарорликни ошириш учун ҳаракат қилишимиз керак», — деб ёзади у.
Бунинг учун, президентнинг сўзларига кўра, Қўшма Штатлар ушбу мақсад натижаларига таъсир кўрсатиши мумкин бўлган давлатлар билан бевосита алоқада бўлиши керак. Улардан бири Саудия Арабистони, дейилади мақолада.
Байденнинг Яқин Шарққа сафари 13 июлдан бошланади ва 16 июлгача давом этади. АҚШ президенти Исроил, Иордан дарёсининг Ғарбий соҳили ва Саудия Арабистонига ташриф буюради. Reuters хабарига кўра, у Саудия қироли Салмон бин Абдулазиз ал-Сауд ва валиаҳд шаҳзода Муҳаммад бин Салмон ал-Сауд билан учрашади.
Америка раҳбарининг сўзларига кўра, сафар «минтақа учун ҳаётий муҳим вақтда бўлмоқда ва Америка манфаатларини илгари суришга ёрдам беради». Хусусан, унинг ёзишича, Яқин Шарқ таъминот занжирларини сақлаб қолиш учун муҳим аҳамиятга эга, минтақадаги энергия ресурслари Россиянинг Украинадаги босқинига жавобан жорий этилган чекловлар оқибатларини юмшата олади.
Изоҳ (0)