Фарғонада солиқ қарздорлиги юқори бўлган тадбиркорлар билан учрашиш ва ундирув чораларини кўриш мақсадида вилоятнинг барча шаҳар ва туманларида хатлов тадбирлари олиб борилмоқда. Бу ҳақда солиқ тушумлари барқарорлигини таъминлаш борасида амалга оширилган ишлар ва келгуси вазифаларга бағишлаб ўтказилган матбуот анжуманида вилоят Давлат солиқ бошқармаси бошлиғи Адҳамжон Тиллаволдиев маълум қилди, дея хабар берди «Дарё» мухбири.
Қайд этилишича, турли важлар билан тўланмай келинаётган солиқ қарздорликларини мол-мулк ҳисобидан қоплаш учун вилоят Давлат солиқ бошқармаси ва МИБ вилоят бошқармаси ҳамкорлигида махсус ишчи гуруҳ ташкил этилган.
2022 йил июнь ойи давомида ўтказилган тадбирлар натижасида солиқдан қарздорлиги мавжуд бўлган 120 та тадбиркорлик субъекти 11,6 миллиард сўм миқдоридаги тўловларни амалга оширган. Шунингдек, қарздорлиги катта бўлган 84 та тадбиркорлик субъектининг 72,1 миллиард сўмлик мол-мулклари хатловга олинган.
Таъкидланишича, давлат бюджетига солиқ тушумлари барқарорлигини таъминлаш борасида амалга оширилган чора-тадбирлар ва тадбиркорлик субъектларига яқиндан кўмаклашиш натижасида вилоятда солиқ тушумлари сезиларли даражада ортган.
Вилоятда 2022 йил 1-ярим йилликдаги бюджет тушумлари 2 триллион сўмдан ошиб, ўтган йилнинг мос даврига нисбатан 1,4 бараварга ўсган.
Изоҳ (0)