Қорақалпоғистон аҳолиси фавқулодда ҳолат вақтида асоссиз кўчага чиқмасликка чақирилди

Ўзбекистон Миллий гвардияси ахборот хизмати раҳбари Даврон Жуманазаров Қорақалпоғистон аҳолисини фавқулодда ҳолат режими вақтида асоссиз кўчага чиқмасликка чақирди. Бу ҳақда 3 июль куни АОКАда ўтказилган брифингда айтиб ўтди.

«Айни вақтда тинчлик ва осойишталик, жамоат хавфсизлигини бузишга уринаётган ҳар қандай шахсларга нисбатан қонун доирасида қатъий чоралар кўрилади.

Шуни алоҳида таъкидлаш жоизки, ижтимоий тармоқларда айрим иғвогарлар шахслар томонидан бошқа давлатларда бўлиб ўтган жамоат тартибсизликлари мобайнидаги турли кўринишдаги эски фото ва видеолавҳалар тарқатилмоқда. Бундай сохта маълумотларга ишонмаслигингизни, аниқ ҳамда тўғри хабарларга эса фақатгина расмий саҳифалар орқали эга бўлишингизни эслатиб ўтамиз.

Шунингдек, ҳозирги вақтда Қорақалпоғистон Республикасидаги юртдошларимизни ҳамжиҳатликка ва оқилона иш тутишларига, жорий этилган фавқулодда ҳолат талабларига қатъий риоя қилишларини, асоссиз кўчага чиқмасликларини илтимос қилиб қоламиз. Турли ғаразли ташвиқот ва ҳаракатларга берилмасликка чақирамиз», — деган Даврон Жуманазаров.

Унинг таъкидлашича, фуқаролар орасида провокацион ташвиқотлар тарқатган ва ҳуқуқни муҳофаза қилиш органлари ходимларининг қонуний талабларига бўйсунмасдан фаол қаршилик кўрсатган айрим шахслар қўлга олинди.

Ўзбекистонда қонун устувор, жиноятга жазо муқаррар деган қоидани амалда таъминлаш учун Қорақалпоғистон Республикасига зарур куч воситалари сафарбар қилинган ва имкониятлар етарли.

Амалга оширилаётган чора-тадбирларнинг барчаси Ўзбекистон тинчлиги, Қорақалпоғистон аҳолисининг осойишталиги ва хавфсизлигини таъминлаш, уларнинг ҳуқуқ ва эркинликларини ҳимоя қилиш ҳамда қонунийлик ва ҳуқуқ-тартиботини тиклашга қаратилган.

Қорақалпоғистондаги вазият

1 июль куни соат тахминан 15:00 лардан бошлаб Нукусда айрим фуқаролар амалга оширилаётган конституциявий ислоҳотларни нотўғри талқин қилиб, кутилмаганда кўча юришларини ташкил қилди. Нукуснинг Марказий деҳқон бозорида тўпланиб, намойишлар уюштирилди.  Жамоат тартибининг бузилишини олдини олиш ҳамда фуқаролар томонидан турли тартиббузарликларни содир этишларига йўл қўймаслик мақсадида деҳқон бозори ҳудудига ҳуқуқни муҳофаза қилиш органларининг куч ва воситалари жалб этилди.

Ҳуқуқни муҳофаза қилиш органлари томонидан қабул қилинган қатъий чоралар билан ташаббускорларнинг ғайриқонуний хатти-ҳаракатлари тўхтатилиб, оммавий тартибсизлик уюштиришга уринишлар тарқалишига чек қўйилди.

Шавкат Мирзиёев 2 июль куни Нукусга борди ва Жўқорғи Кенгес депутатлари, Қорақалпоғистон фахрийлари ва фаоллари билан учрашув ўтказди. Учрашувда президент Конституциянинг Қорақалпоғистонга тегишли моддаларини амалдаги таҳрирда ўзгаришсиз қолдириш зарурлигини айтди. Қорақалпоғистон халқига мурожаат қилиб, Конституциявий қонун лойиҳаси референдумдан кейингина қонуний тусга киришини айтиб, фуқароларнинг хоҳиш-иродаси, таклиф ва фикрларидан келиб чиққан ҳолда, ушбу лойиҳа ўзгариб, такомилига етказилишини таъкидлади.

Давлат раҳбари ҳозирги вазиятда барча фуқароларни ҳамжиҳатлик ва бирдамликка, оқилона иш кўришга, турли ғаразли чақириқ ва ҳаракатларга берилмасликка даъват этди.

Шундан сўнг  президент фармони билан Қорақалпоғистонда 3 июлдан 2 августгача фавқулодда ҳолат жорий этилиб, бир қатор чора ва вақтинчалик чекловлар ўрнатилди. Фавқулодда ҳолат амал қилиши даврида Ўзбекистон Мудофаа вазирлиги кучлари ва воситалари қўшимча равишда жалб этилиши белгиланди.

3 июль куни Шавкат Мирзиёев яна Нукусга бориб, видеоселектор ўтказди. Туман ҳокимлари ва ҳуқуқни муҳофаза қилувчи органлар раҳбарлари фуқароларнинг хавфсизлигини таъминлаш, қонунийлик ва ҳуқуқ-тартиботни мустаҳкамлаш бўйича кўрилаётган чора-тадбирлар юзасидан ахборот берган. Давлат раҳбарининг мурожаатидан кейин вазият барқарорлашгани, ҳаёт ўз маромига қайтаётгани маълум қилинди.