Ўзбекистонда ниқоб режими ҳозирча жорий этилгани йўқ, аммо ниқоб тақиш тавсия этилмоқда
Соғлиқни сақлаш вазирлиги Санитария-эпидемиологик осойишталик ва жамоат саломатлиги хизмати Эпидемиология ва юқумли касалликлар профилактикаси бошқармаси бошлиғи Рустам Икромов фуқароларга эҳтиёткорлик юзасидан тиббий ниқобларни тақиб юришни тавсия қилди.
«Ҳозирча жамоат жойларида тиббий ниқоб тақиб юриш бўйича Республика махсус комиссиянинг қарори келмади, бироқ соғлиқни сақлаш ва эҳтиёткорлик юзасидан тиббий ниқобларни тақиб юришни маслаҳат берамиз.
Унинг сўзларига кўра, айни дамда коронавируснинг омикрон штамми кўпроқ учрамоқда. «Касалликка чалинаётганлар орасида 90 фоизи — эмланмаган фуқаролар. Қолгани 10 фоизи эса вакцина олганига 1 йилдан кўп бўлган, иммунитети паст фуқаролар ёки ҳомиладор аёллар ва болалардир. Ҳозирга қадар рўйхатга олинган барча вакциналар ўз самарасини кўрсатмоқда ва шу муносабат билан мамлакатимизда айнан шу вакциналардан фойдаланиш давом эттирилади», — дейди Икромов.
Таъкидлаш керакки, сўнгги кунларда Ўзбекистон президенти раислигида бўлиб ўтган йиғилишларда мутасаддилар яна ниқобда кўриниш бермоқда.
23 июнь куни Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев Ўзбекистонда коронавирус омикрон штаммининг энг юқумли деб айтилаётган Stealth-Omicron BA.2 варианти аниқланганини маълум қилганди. Мамлакатда коронавирус инфекцияси билан касалланиш ҳолати бир неча кундан буён ортмоқда. Хусусан, 28 июнда — 98 кишида, 27 июнда — 91 кишида, 26 июнда — 133 кишида, 25 июнда 139 кишида касаллик қайд этилган.
