Наманганда «Қора дори – 2022» тадбирлари давомида ички ишлар идоралари томонидан жами 58 та жиноий ҳолат аниқланди. Бу ҳақда «Дарё» мухбири Азизбек Абдувалиев хабар бермоқда.
Тадбир бошланганидан бери ўтган 40 кун давомида ушланган шахслардан 3,2 килограмдан ортиқ гиёҳванд моддалар олинган. Бундан 1 килограмм 853 грамми кучли таъсир қилувчи дори воситалари, 1 килограмм 079 грамми гашиш, 270 грамми марихуана ва 31 грамми кўкнор сомони ҳисобланади.
Наманган вилоят ИИБ матбуот хизмати раҳбари Шокиржон Ҳошимовнинг қайд этишича, олиб борилаётган тезкор тадбирлар давомида асосий эътибор жиноятнинг илдизларига қаратилмоқда.
«Жорий йил 7 июнь куни Давлатобод тумани, «Навбаҳор» маҳалласида яшовчи 36 яшар фуқаро бошқарувидаги Lacetti автобили холислар иштирокида қўздан кечирилиб, машинада 0,81 грамм гашиш гиёхванд моддаси борлиги аниқланди.
Жиноят занжирини топиш мақсадида мазкур фуқаро иштирокида ‘Назоратли харид‘ тадбири ўтказилди. Унда Наманган шаҳри, Гулистон маҳалласида яшовчи 1962 йилда туғилган фуқаро тадбир иштирокчисига 500 000 сўм эвазига 3 грамм гашиш сотган вақтида қўлга олинди. Унинг яшаш хонадони холислар иштирокида кўздан кечирилганида ертўладан қора елим халтага ўралган умумий оғирлиги 56,7 грамм марихуна ҳамда 62,16 грамм гашиш моддалари олинди», — дейди Шокиржон Ҳошимов.
Наманганда «Қора дори – 2022» тадбирлари давом этмоқда.
Мавзуга доир:
Фарғонада уйининг томорқасида 125 туп кўкнори парваришлаб келган аёл ушланди
Изоҳ (0)