Фарғонада икки фуқаронинг Қирғизистондаги ўқишини кўчириб бериш учун 4,6 минг доллар олган шахслар ушланди
Фарғона вилоятининг Бағдод туманида талабаларнинг ўқишини кўчириб бермоқчи бўлган шахслар ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Бағдод туман бўлими томонидан терговга қадар текширув ўтказилган. Текширув давомида Р.Д., Д.Й. ва Х.А. исмли фуқаролар қўшни Қирғизистон университети талабалари Б. ва Д.нинг ишончига кириб, уларнинг ўқишини Андижон давлат тиббиёт институти ҳамда Фарғона давлат университетига кўчириб беришни ваъда қилгани аниқланган.
Улар хизмати эвазига 800 доллар ва 38 миллион сўм ҳамда контракт тўлови учун 36 миллион сўмни, шунингдек, семестр имтиҳонларини якунлаб бериш эвазига яна 120 долларни қўлга киритган. Текширув давомида Д.Й. томонидан ўз айбига иқрор бўлиб қайтарган 800 доллари ашёвий далил сифатида олинган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода фуқаронинг Тожикистондаги ўқишини кўчириб бериш учун 2 минг доллар олган аёл қўлга тушгани, Сурхондарёда фуқаронинг Тожикистондаги ўқишини 1,5 минг доллар эвазига кўчириб беришни ваъда қилган шахс ушлангани тўғрисида хабар берилганди. Мавзуга доир:
