Украина Қуролли кучлари ўтган кун давомида «оғриқли йўқотишлар»га учради. Бу ҳақда Украина президенти Владимир Зеленский ўз видеомурожаатида маълум қилди.

«Энг шафқатсиз жанглар аввалгидек, Северодонецкда, унинг атрофидаги барча шаҳар ва жамоаларда кечмоқда Афсуски, йўқотишлар бор ва улар оғриқли», — деди Зеленский.

Давлат раҳбари Харьков вилоятида ҳам Украина ҳарбийлари орасида йўқотишлар борлигини қўшимча қилди.

1 июнь куни Зеленский Украинада жанговар ҳаракатлар оқибатида ҳар куни 100 нафаргача украиналик ҳарбий ҳалок бўлаётганини айтганди. «Вазият жуда оғир. Ҳар куни жангларда 60 нафардан 100 нафаргача аскаримизни йўқотяпмиз, 500 га яқин одамимиз яраланмоқда», — деган у.

10 июнь куни Зеленский офисининг вакили Михаил Подоляк Украина армиясининг кунлик йўқотишларини 200 кишигача деб баҳолади.

Украина ҳам, Россия ҳам қўшинларининг урушдаги йўқотишлари ҳақида мунтазам равишда хабар бермаяпти. Россия Мудофаа вазирлиги бу маълумотни икки марта, охирги марта 25 март куни эълон қилганди — ўшанда 1351 киши ҳалок бўлгани ва 3825 киши яралангани ҳақида хабар берилган. Апрель ойи ўрталарида эса Владимир Зеленский уруш бошидан бери 2500 дан 3000 гача украиналик ҳарбий хизматчи ҳалок бўлганини, яна 10 мингга яқини яраланганини айтди.