Ижтимоий тармоқ саҳифаларида Тошкент—Шаҳрисабз йўналишидаги поездларга чипта топиш муаммоси мавжудлиги ҳақида хабарлар тарқатилди. Мазкур ҳолатга йўловчиларни темир йўл орқали ташиш билан фаолият юритувчи «Ўзтемир йўлйўловчи» муносабат билдирди.

Маълум қилинишича, 2019 йилнинг 15 март кунидан 2020 йилнинг 24 март кунига қадар Тошкент—Шаҳрисабз—Тошкент йўналишида юқори тезликда ҳаракатланувчи «Афросиёб» электропоездлари ўз қатновларини амалга ошириб келган. Бир йил даврида ҳаракатланган йўловчилар оқими таҳлил қилинганда, Шаҳрисабздан Тошкент шаҳрига келувчи ҳамда Тошкент шаҳридан Шаҳрисабзга борувчи йўловчилар сони жуда камлиги сабабли (умумий йўловчиларнинг бир фоизига ҳам етмайди), мазкур поезд қатнови Қарши шаҳрига қадар қисқартирилган ва 2020 йилда карантин чоралари юмшатилганидан сўнг поезд Тошкент—Қарши—Тошкент йўналишида ҳаракатланишни бошлаган.

2022 йилнинг апрелида Ўзбекистон президентининг топшириғига асосан май ойидан бошлаб юқори тезликда ҳаракатланувчи «Афросиёб» электропоездлар ҳаракати Тошкент—Шаҳрисабз—Тошкент йўналишида қайта тикланган ва ҳафтанинг ҳар шанба ва якшанба кунлари амалга ошириб келинган. 25 июндан бошлаб ушбу поезд Шаҳрисабзгача фақат йўловчилар сони кўп бўлган якшанба куни боради.

«Ҳафтанинг бошқа кунларида эса йўловчилар сони жуда ҳам кам бўлмоқда. Шу ўринда қайд этиш лозим, 6317/6318-сонли Қарши—Шаҳрисабз—Қарши йўналишида ҳар куни шаҳарлараро электропоездлар қатнови мавжуд», — дейилади муносабатда.

Тошкент—Шаҳрисабз—Тошкент йўналишда ҳаракатланувчи «Афросиёб» электропоездидаги жойлар сони 286 тани ташкил этади ва чипталар эркин савдога 45 кун олдин чиқарилади. Поезд жўнашига саноқли кун қолганида, талаб юқори бўлган чипталарни расмийлаштириш (сотиб олиш) эҳтимоли кам.

«Йўловчиларга қулайлик яратиш мақсадида темир йўл кассаларига бормасдан ‘Chipta.railway.uz’ ёки ‘E-ticket.railway.uz’ сайтлари орқали электрон чипта харид қилиш имконияти яратилган», — дейилади хабарда.