Француз модалар уйи Balenciaga яна бир бор ўзини футбол дунёсида синаб кўришга қарор қилди. Бренд бу сафар Adidas билан биргаликда янги спорт либослари коллекциясини тақдим этди. Либослар намойиши эса Нью-Йорк фонд биржаси биносида бўлиб ўтди.
Тақдим этилган либослар «Манчестер Юнайтед» формаларини эслатиб юборади. Adidas’нинг ўтмишдаги ишлари таъсири бу либосларда ҳам сақланиб қолганига гувоҳ бўлиш мумкин.
Умуман олганда, дизайнерлар катта эҳтимол билан «Ливерпуль» 2008/10 йилги мавсумларда фойдаланган либослардан илҳомлангани кўринади. Уч чизиқ ва Adidas логотипи ўз ўрнида, Carlsberg («Ливерпуль» ҳомийси) ёзуви ўрнини эса Balenciaga эгаллаган.
Balenciaga’нинг ушбу либослар яратилишида иштироки сабаб уларнинг нархи яхшигина кўтарилганини кўриш мумкин. Масалан, футболканинг ўзи учун 995 доллар сўралмоқда. Бутун коллекцияни олишни истаган киши эса 5500 долларга пул тўлашига тўғри келади. Коллекциядан эса спорт костюми, куртка, худи, кроссовка ва бошқа аксессуарлар ўрин олган.
Balenciaga футбол дунёсига биринчи марта 2020 йил мартида «бош суқиб кўрган». Париждаги модалар ҳафталиги вақтида бренд АW20 коллекциясини тақдим этган.
«Болалигим Грузияда футболчилар ва руҳонийлар орасида ўтганди», — дея бренднинг коллекциясини изоҳлаганди ўша вақтдаги ижодий ғоялар бўйича директор Демна Гвасалия.
Коллекция тўртта тўлиқ — қизил, тўқкўк, қора ва сариқ рангли комплектдан иборат эди. Хаёлий футбол клуби либосидан бренд логотипи ва Баленcига ёзуви ўрин олганди. Либослардан бири эса узун енгли қилиб ишланганди.
Balenciaga — бу модалар уйи бўлиб, унга 1919 йилда испан дизайнери Кристобал Баленсиага томонидан асос солинган. Унинг мижозлари орасида Испания қироллик оиласи ҳамда арикстократлар бўлган. Баленсиага 1937 йил, Испаниядаги фуқаролик уруши вақтида, Парижга кўчиб ўтган. Айни дамда бренд француз компанияси Kering’га тегишли.
Изоҳ (0)