Россия Меҳнат вазирлиги Ўзбекистондан келиши мумкин бўлган мигрантлар сонига қўйилган чекловни олиб ташлашни режалаштирмоқда

Россия Меҳнат вазирлиги Россияга чет элликларни ишга жойлаштириш бўйича пилот лойиҳа доирасида мамлакатга кириши мумкин бўлган ўзбекистонлик мигрантлар сонига қўйилган чекловни олиб ташлашни таклиф қилмоқда. Ҳозирда ушбу чекловга кўра, пилот лойиҳа доирасида 10 минг нафар Ўзбекистон фуқароси Россияга ишлаш учун бора олади, деб хабар беради «Коммерсантъ».

Шунингдек, идора тармоқ тамойилини бекор қилиш тарафдори — ҳозирча мамлакатдан ишчи кучи импорти учун фақат қурилиш сектори ва агросаноат комплекси корхоналари ариза беришлари мумкин, эндиликда тажриба доирасида иқтисодиётнинг бошқа тармоқлари ташкилотларига ҳам рухсат бериш таклиф қилинмоқда. Шу билан бирга, пилот лойиҳанинг мақсадли иштироки сақланиб қолади: ишчилар аниқ иш берувчининг талабидан келиб чиқиб жалб этилади.

Россия Меҳнат вазирлиги потенциал иштирокчилар доирасини кенгайтириш мақсадида Ўзбекистондан мамлакатга меҳнат мигрантларини мақсадли олиб кириш бўйича пилот лойиҳанинг бир қатор параметрларини ўзгартиришни таклиф қилмоқда. Ҳукумат қарорига ўзгартириш киритишни назарда тутувчи лойиҳа 2021 йилнинг 6 октябрида ҳуқуқий ҳужжатлар порталида эълон қилинганди.

Эслатиб ўтамиз, 2021 йилнинг октябрида Россия Меҳнат, Қурилиш ва Ички ишлар вазирликлари мамлакатга хорижлик ишчиларни жалб этишнинг янги механизми устида иш бошлаган. Ўзбекистон ҳукумати билан тузилган махсус битимга кўра, Россияга қурилиш ва агросаноат комплекси корхоналарига 10 минг нафар ўзбекистонликни жалб этишни назарда тутувчи пилот лойиҳа ишга туширилган эди.

Қарорга киритиладиган ўзгартиришлар лойиҳасида келтирилишича, Меҳнат вазирлиги ушбу пилот лойиҳа доирасда Россияга кириши мумкин бўлган ишчилар сонининг амалдаги чегарасидан воз кечишни таклиф қилмоқда. Бироқ бу ўз навбатида хорижликларни иқтисодиётнинг турли тармоқлари учун квоталар шаклида жалб қилиш бўйича жорий чекловни бекор қилмайди. Шунингдек, ўзгартиришлар билан иш берувчининг лойиҳада иштирок этиши учун ариза бера оладиган соҳа турларига қўйилган чекловлар олиб ташланади. «Қурилиш соҳасида ва агросаноат комплекси соҳасида» деган сўзлар «ва Россия иқтисодиётининг бошқа тармоқларида» деган сўзлар билан тўлдирилади.

«Инвестицион технологиялар» МЧЖ бош директори Дмитрий Котровскийнинг таъкидлашича, «мавжуд барча харажатларга қарамай, қурилиш секторига ишчи кучи этишмаслиги билан боғлиқ муаммолари ҳеч қаерга йўқолмаган — ҳозирда вазият анча ёмонлашган». Унинг сўзларига кўра, пилот лойиҳа доирасида мамлакатга киришига рухсат бериладиган мигрантлар сонига қўйилган чекловнинг олиб ташланиши — «бу бозорга анча арзон ишчи кучи келмаса, мавжуд ресурслар етмай қолишини тушунишдир».

Аввалроқ Россияда ўзбекистонлик мигрантларни молиявий бонуслар билан жалб қилиш таклиф этилгани, Ўзбекистон фуқаролари энди Россияда 15 кунгача рўйхатдан ўтмай юриши мумкинлиги тўғрисида хабар берилганди.