Ўзбекистондаги аҳоли омонатларининг ўртача ставкаси 21,7 фоизга етди

Банк тизимидаги топ-10 тижорат банкининг юқори фоиз ставкалари бўйича амалга оширилган навбатдаги мониторинг натижалари тақдим этилган. Бу ҳақда Марказий банк хабар берди.

Унга кўра, 2022 йил 1 май ҳолатида ушбу банклардаги аҳоли омонатларининг юқори фоиз ставкалари 21-23 фоиз атрофида шаклланиб, ўртача 21,7 фоизни ташкил қилди.

Аҳоли омонатлари бўйича юқори фоиз ставкаларини аниқлашда барча мижозлар учун чекловлар ва олдиндан шартлар мавжуд бўлмаган банк омонатларининг юқори ставкалари ҳисобга олинган.

Алоҳида тоифадаги мижозлар (пенсионер, болалар, талабалар ва ҳ.к.) учун мўлжалланган ҳамда капитализация қилинадиган омонатлар ҳисобга олинмаган.

Асосий ставка пул-кредит сиёсатининг асосий воситаларидан бири ҳисобланади. 2020 йилгача унинг ўрнида қайта молиялаш ставкаси амал қилган.

Ушбу ставка бошқа ставкаларга (масалан, кредитлар ёки депозитлар бўйича), шунингдек, аҳоли ва корхоналарнинг истеъмол ва инвестиция қарорларига таъсир қилади. Буларнинг барчаси ички талаб ва инфляцияга таъсир қилади.

Шу тариқа, ставка даражаси, одамлар нима билан шуғулланишидан қатъи назар, барчага, қаердадир тўғридан-тўғри, қаердадир билвосита, таъсир қилади.