Бугун,

  • USD 10920.28
  • RUB 177.49
  • EUR 11052.42

Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Ўзбекистонда маймунчечак қайд этилмаганини маълум қилди, деб хабар беради «Дарё» мухбири.

Фото: «Дарё» / Оғабек Самисов

Жаҳон соғлиқни сақлаш ташкилотининг маълумотларига кўра, касаллик ҳозиргача 14 та давлатда қайд этилган. Хусусан, инфекцияни юқтирганлар сони 90 нафарга яқинлашгани айтиляпти. Қолаверса, қарийб 30 киши касалликка чалинганликда гумонланмоқда, шу кунгача ўлим ҳолатлари рўйхатга олинмаган.

«Аслида, бу хасталик кеча ёки бугун пайдо бўлгани йўқ. Яъни илк бор у бундан 52 йил аввал Конго Демократик Республикасида аниқланган. Касалликнинг алоҳида ҳолатлари Марказий ва Ғарбий Африка мамлакатларида кузатилган. Биздаги маълумотларга кўра, маймунчечак деярли барча ҳолатларда ҳайвонлардан одамга юқади. Асосан эндемик ҳудудларга сафар қилган ва жониворлар билан мулоқотда бўлган кишиларда тасдиқланиши мумкин», — дейди Отабеков.

Дунё бўйлаб касалликнинг қайта авж олиши 7 май санасидан бошланган. Шу куни Буюк Британияга Нигериядан қайтган сайёҳда мазкур инфекция аниқланган. Унда касаллик белгилари терида тошмалар тошиши билан намоён бўлган. Шундан сўнг ушбу мамлакатда ўнга яқин беморлар маймунчечакка чалингани маълум бўлган.

Санитария-эпидемиологик осойишталик ва жамоат саломатлиги хизмати бошлиғи ўринбосарининг таъкидлашича, касаллик одатда енгил кечмоқда ва беморларнинг кўпчилиги бир неча ҳафта ичида тузалиб кетяпти. Шунга қарамай, ҳозир ЖССТ маймун инфекцияси кенг тарқалиб кетмаслиги учун дунё мамлакатларини профилактик чораларни кучайтиришга чақирмоқда.

«Ўзбекистонда ҳозирга қадар маймунчечак қайд этилгани йўқ. Айни пайтда ЖССТ тавсияларидан келиб чиқиб бу инфекциянинг юртимизга кириб келмаслиги учун зарур чораларни кўряпмиз», — дейди Нурмат Отабеков.

Мутахассислар фикрича, айнан маймунчечакка қарши эмлаш препаратлари мавжуд бўлмаса-да, бир қатор мамлакатлар оддий чечакка қарши вакциналар орқали бунинг олдини олишга ҳаракат қилмоқда. Чунки икки вирус бир-бирига ўхшаш ва шу туфайли бундай вакциналар маймун чечагининг олдини олишда тахминан 85 фоизга самара бериши кутиляпти.

Аввалроқ маймунчечак билан касалланиш ҳолатлари Италия, Швеция, Испания, Буюк Британия, Португалия, АҚШ, Канада ва Австралияда, Бельгия ва Францияда қайд этилгани, ЖССТ маймунчечак авж олиши туфайли фавқулодда йиғилиш ўтказиши тўғрисида хабар берилганди.

Изоҳ
Асосий янгиликлар