Самарқанд вилоятида ер ресурсларини талон-торож қилиш билан боғлиқ ҳолат аниқланди. Бу ҳақда вилоят Ички ишлар бошқармаси хабар қилди.
Қайд этилишича, Самарқанд вилоят ИИБ бошлиғи номига фуқаро ариза билан мурожаат қилган. Унда иссиқхона ташкил қилиш ҳамда паррандачилик билан шуғулланиш мақсадида Ургут тумани ҳудудидан ер олиш учун Ургут тумани «Қоранайман» МФЙда яшовчи Х. исмли шахс билан танишиб қолганини билдирган. Х. исмли шахснинг 0,32 гектар сувли ер майдони борлигини айтиб, ушбу ер майдонини 25 минг долларга сотиб олишга келишганини ҳамда ерни унинг номига Ургут тумани Кадастр бўлимида ишловчи Р.Х. орқали расмийлаштириб беришини айтганини ёзган. Х. бунинг эвазига қўшимча 6 миллион сўм пулларни талаб қилиб келаётганлигини билдириб, уларга нисбатан қонуний чора кўришни сўраган.
Аризага асосан, 14 май куни Самарқанд тумани «Жўйи Аббос» маҳалласида тезкор тадбир ўтказилган. Тадбир давомида Х. ариза муаллифидан 25 минг доллар ва 6 миллион сўм миқдоридаги пулларни олган вақтида ашёвий далиллар билан қўлга олинган.
Ҳолат юзасидан терговга қадар текшириш ҳаракатлари олиб борилмоқда.
Изоҳ (0)