Lada Xray ишлаб чиқарилиши тўхташи мумкин. Бу модель Ўзбекистонда ҳам йиғилади

Россиянинг «АвтоВАЗ» компанияси Xray модели ишлаб чиқаришни тўхтатиши мумкин, деб хабар берди «Autonews.ru».

Мавжуд маълумотларга кўра, компания Xray моделининг янги авлодини яратиш билан шуғулланмайди ва жорий версиясини янгилаш устида ишламайди.

Бундан ташқари, модель тез орада конвеерни бутунлай тарк этиши мумкин. Сабаби — Renault’нинг Россиядан кетиши ва бутловчи қисмларни етказиб беришдаги қийинчиликлар.

Xray «АвтоВАЗ» биринчи бўлиб микрочип етишмаслигидан азият чекди. 2021 йил июль ойида завод Lada EnjoY Pro мултимедиа тизимига эга ушбу автомобилларни ишлаб чиқаришни тўхтатиб қўйган эди. Ўша вақтдан бери бундай конфигурацияларни йиғиш қайта тикланмади, — дейилади хабарда.

«АвтоВАЗ» бунга изоҳ беришдан бош тортди.

Ўзбекистонда Xray SKD усулида АDМ-Jizzakh автомобиль заводида йиғилади. Нархлар 178,9 миллион сўмдан бошланади.

Аввалроқ Ўзбекистонда Lada автомобилларини тўлиқ ишлаб чиқариш йўлга қўйилиши режалаштирилгани ҳақида хабар берилган эди.