Бухоро шаҳрида илк бор халқаро зардўзлик ва заргарлик, каштадўзлик санъати фестивали ўтказилади. Айни пайтда фестивалга тайёргарлик ишлари олиб борилмоқда, дея хабар бермоқда «Дарё» мухбири.
Президентнинг 2021 йил 29 апрелдаги «Халқаро зардўзлик ва заргарлик фестивалини ўтказиш тўғрисида»ги қарорига асосан, фестиваль вилоят ҳокимлиги, Маданият вазирлиги, «Ҳунарманд уюшмаси», Ўзбекистон Савдо-саноат палатаси, «Ўзбекзарсаноат» уюшмаси ҳамкорилигида ўтказилади.
Айни кунларда фестивални юқори савияда ўтказиш учун шаҳарнинг тарихий қисмида ободонлаштириш, безатиш ишлари бошланган. Билдирилишича, Бухоро шаҳрининг 20 дан ортиқ кўчаларининг ҳар бирига шаҳар ҳамда вилоят ҳокимлиги тизимидаги бошқарма, корхона ва ташкилотлардан масъуллар бириктирилган.
«Бухорода илк бор ўтказилаётган мазкур халқаро фестивалнинг мақсади халқ амалий санъатининг зардўзлик ва заргарлик анъаналарини ривожлантириш, уларнинг ноёб намуналарини тарғиб этиш, халқлар ўртасида дўстлик ва ҳамкорликни янада мустаҳкамлашга, ҳунармандчилик анъаналари ва мактабларини сақлаш, қайта тиклашга қаратилган. Зардўзлик ва заргарлик буюмларининг кенг кўламли тақдимотлари ўтказилади. Унда нафақат, бухоролик, балки, ҳар бир вилоятдаги ҳунарманд мактаблари тарихи, ҳаёт тарзи ва анъаналарини акс эттирган кўргазмаси ҳам ташкил этилади. Арк қалъасидан Лаби Ҳовуз мажмуасигача бўлган манзил байрамона безатилмоқда. Шу кунларда Арк қалъаси майдонида барпо этилаётган саҳна Бухоронинг ҳунармандчилик маҳсулоти ‘Шибирма’ сирғаси шаклида тайёрланмоқда. Саҳна 2000 нафардан зиёд томошабинга мўлжалланган», — деди Бухоро шаҳар ҳокими Жамол Носиров.
Халқаро фестивалда турли томошалар, тақдимотлар, кўргазмалар, мусиқали театр концертлари ва кўнгилочар дастурлар, маданий-маърифий тадбирлар ташкил этилиши, шунингдек, «Анъанавий зардўзлик ва заргарлик санъати фестивали» мавзусида илмий-амалий конференция ўтказилиши режалаштирилган.
Ўзбекистон «Ҳунарманд» уюшмаси Бухоро вилояти бошқармаси бошлиғи Акбар Муҳаммедовнинг сўзига кўра, халқаро фестивалда иштирок этиш учун хорижлик меҳмонлар жорий йилнинг 19 май кунидан бошлаб келишни бошлаган. Уларга инглиз, араб, форс, испан, турк ва рус тилида мукаммал сўзлашадиган волонтёрлар ҳамроҳлик қилмоқда.
Таъкидланишича, фестивалда иштирок этиш учун республиканинг барча ҳудудларидан 288 нафар ҳунарманд, жумладан, 110 нафар заргар, 37 нафар зардўз, 44 нафар каштадўз, 97 нафар ҳунармандчиликнинг бошқа йўналишларида фаолият олиб бораётган ҳунарманд ва шунингдек, 58 та давлатдан 221 нафар хорижлик иштирокчи, 112 нафар ҳунарманд, 9 нафар фахрий меҳмон, 4 нафар юқори мартабали хорижлик давлат арбоблари ташрифи режалаштирилган.
Фестиваль жараёнларини ёритиш учун маҳаллий оммавий ахборот воситаларининг 200 дан ортиқ вакиллари, шунингдек, Ўзбекистонда доимий фаолият юритаётган 6 та давлатнинг 14 нафар журналистини жалб қилиш кўзда тутилган.
Изоҳ (0)