Бухорода икки нафар фарзандига алимент тўлашдан бўйин товлаб келган ота 15 сутка қамоқ жазоси тайинланганидан сўнг, хотини билан ярашди. Бу ҳақда «Дарё»га МИБ вилоят бошқармаси матбуот хизмати раҳбари Ихтиёр Олимов хабар берди.
Таъкидланишича, Бухоро туманида яшовчи фуқаро Ж.З. қарийб тўрт йилдан буён икки нафар фарзандининг моддий таъминоти учун алимент тўламай келган. Оилавий келишмовчилик сабаб 2019 йилда эрининг уйидан чиқиб кетган фуқаро З.Қ. 2021 йилда алимент ундируви бўйича Фуқаролик ишлари бўйича Бухоро туманлараро судига мурожаат қилган. Суд буйруғини таъминлаш учун бюронинг туман бўлими давлат ижрочиси томонидан бир неча бор огоҳлантиришларга қарамай, қарздор Ж.З. алимент тўловидан қочиб юрган.Жиноят ишлари бўйича Пешку туман суди қарорига кўра, жавобгарга нисбатан 15 сутка қамоқ жазоси тайинлангач, қарздор хотини билан ярашиб, бирга яшашга қарор қилган. Шундан сўнг у Жиноят ишлари бўйича Бухоро туман суди ажримига асосан жиноий жавобгарликдан озод қилинган.
«Алимент тўловидан қочиб юрган фуқаро камида 8 миллион сўмдан ортиқ қарзини амалга ошириши керак эди. Улар ярашиш ҳуқуқидан фойдаланишгани учун қарздор энди жавобгар саналмайди», — деди Ихтиёр Олимов.
Изоҳ (0)