АОКАда Монополияга қарши курашиш қўмитаси ва унинг ҳудудий бўлимлари томонидан 2022 йилнинг дастлабки чорагида амалга оширилган ишларга бағишланган матбуот анжумани бўлиб ўтди.
Матбуот анжуманида журналист қўмита раиси Шоҳрух Шораҳметовга давлат раҳбари 2022 йил бошида «Ўзавтосаноат»га автомобиль харидида юзага келаётган навбатларни 1 май санасига қадар бартараф этиш борасидаги вазифа қўйгани ва қўмита бу борада амалга оширилаётган ишларни кузатиб боряптими, деган саволни берган.
«Бу вазият бўйича дастлаб UzAutoMotors раҳбариятидан сўрасангиз, мақсадга мувофиқ бўлар эди. Уларни ҳимоя қилиш ниятимиз йўқ. Жаҳон бозорида бўлаётган ҳолатларни кузатишингизни тавсия қиламан. Номларини айтмасам ҳам, йирик-йирик компаниялар автомобиль ишлаб чиқаришни тўхтатяпти. Чунки яримўтказгичлар масаласи турибди. Айтмоқчи бўлганим, бу фақат Ўзбекистондаги вазият эмас. Яна бир бор қайтараман, нима сабабдан бундай бўлаётганини UzAutoMotors раҳбариятидан сўрасангиз, улар сизга батафсилроқ тушунтириб беради», — дея жавоб қайтарган Шораҳметов.
Эслатиб ўтамиз, февраль охирларида Шавкат Мирзиёев йиғилишда Вазирлар Маҳкамасига уч кун ичида автомашиналар импорти учун божхона тўловларини 2 баробарга камайтириш, автомобиллар нархини 5 фоизга арзонлаштириш, маҳаллийлаштириш даражасини 48 фоиздан 56 фоизгача ошириш бўйича қарор лойиҳасини ишлаб чиқиш топшириғини берганди. Шунингдек, президент 1 майга қадар автомобиль сотиб олишдаги навбатларни тўлиқ бартараф этиш, UzAuto Motors автомобиллари учун олдиндан тўловни 85 фоиздан 50 фоизга камайтириш вазифасини ҳам қўйганди.
Изоҳ (0)