Ижтимоий тармоқларда Тошкентдаги шифохоналарнинг бирида аёллар ва эркак ўртасидаги жанжал акс этган видео тарқалди. Пойтахт ИИББнинг маълум қилишича, жанжал аёллар шифокор қабулига навбатсиз киргани сабаб келиб чиққан.

Маълум қилинишича, 4 май куни соат 20:30 ларда Юнусобод туманида жойлашган хусусий клиникалардан бирида 30 ёшли Й.Л. ва унинг 26 ёшли синглиси Й.Х. шифокор кўригига навбатсиз кириб кетган. Бундан норози бўлган навбатда турган эркак М.С. (1993 йилда туғилган) эътироз билдирган. Натижада улар ўртасида ўзаро жанжал чиққан.

Мазкур ҳолат юзасидан Юнусобод тумани ИИО ФМБ Тергов бўлими томонидан Жиноят кодексининг 277-моддаси (безорилик) аломати билан жиноят иши қўзғатилган. Тергов давом этмоқда.

Бундан олдин Тошкентда 21 ёшли йигит севган қизи тўғрисида «ёмон гаплар» айтган танишини пичоқлаб қўйгани, Тошкентдаги кафеда Хитой фуқароси аёлни оила аъзолари қаршисида ургани тўғрисида хабар берилганди.