Андижонда иссиқхона учун ажратилган 50 минг долларни талон-торож қилган банк филиали бошқарувчисининг собиқ ўринбосари қўлга тушди
Андижон вилояти Избоскан туманида замонавий иссиқхона қуриш учун ажратилган кредитни талон-торож қилиш ҳолати аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Избоскан тумани бўлими томонидан «Туронбанк» АТБ Андижон филиалининг мурожаатига асосан терговга қадар текширув ўтказилган. Унда мазкур филиал бошқарувчиси собиқ ўринбосари И.К. ва тумандаги «Ҳ.» хусусий боғдорчилик хўжалиги раҳбари Х.П. замонавий энергия тежамкор иссиқхона қуриш учун ажратилган 50 минг доллар имтиёзли кредит маблағи эвазига иссиқхона қурмасдан, расмий ҳужжатларга сохта маълумотлар киритиш орқали талон-торож қилгани аниқланган. Текширув давомида етказилган зарарнинг 20 минг доллари ундирилиши таъминланган.
Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 209-моддаси (мансаб сохтакорлиги) ва 228-моддаси (ҳужжатлар, штамплар, муҳрлар, бланкаларни қалбакилаштириш) билан жиноят иши қўзғатилган. Ҳозирда тергов ҳаракатлари ўтказилмоқда.
Аввалроқ Тошкентда хориж фуқаросига тегишли қурилиш материаллари ишлаб чиқарувчи ускуналар талон-торож қилингани, Жиззахда тадбиркорнинг 260 млн сўмлик мулкини ўзлаштирган иш юритувчи ушлангани, Жиззахда ХТБ томонидан мактаблар учун 86 та сув иситиш қозонлари қиммат нархларда харид қилингани хабар қилинган.
