Шавкат Мирзиёев 22 апрель куни Қарши шаҳридаги кичик саноат зонасида жойлашган UzShoes қўшма корхонаси фаолияти билан танишди. Бу ҳақда Президент матбуот хизмати хабар қилди.
Қайд этилишича, Қашқадарёда чарм хом ашёси кўп ҳисобланади. Давлат раҳбари вилоятга аввалги ташрифи чоғида бу имкониятдан фойдаланиб, чарм маҳсулотларини қайта ишлашни йўлга қўйиш бўйича кўрсатма берган. Шундан сўнг ҳудудда 4 та лойиҳа ишга туширилган. Хусусан, UzShoes корхонаси беларуслик ишбилармонлар билан ҳамкорликда 6 миллион доллар эвазига ташкил этилган. Корхонага Германия, Италия ва Австриядан ускуна ва жиҳозлар келтириб ўрнатилган. 350 та иш ўрни яратилган.
Корхона йилига 500 минг жуфт пойабзал ишлаб чиқариш қувватига эга. Бугунги кунда эркаклар, аёллар ва болалар учун 10 турдаги чарм пойабзаллар тайёрланмоқда. Сифатли ва чиройли бу маҳсулотлар импорт ўрнини бемалол босади.
Шунингдек, Қаршида тикилган пойабзаллар Европа мамлакатларидаги 100 дан ортиқ савдо дўконларида сотилмоқда. Қўшни давлатлар ва Ҳиндистон билан келишувларга эришилган.
Давлат раҳбари пойабзалларни тайёрлаш жараёнини кўздан кечирган, шу ерда ишлаётган хотин-қизлар билан суҳбатлашган.
Бундан ташқари, Президент Қарши шаҳрида спорт таълими бўйича тақдимот билан танишган. Спортни ривожлантириш вазири ёшлар ўртасида оммавий спортни ривожлантириш чора-тадбирлари бўйича 1 апрель куни ўтказилган йиғилишдаги вазифалар ижроси тўғрисида ҳисобот берган. Мутасаддиларга чет эллик мутахассисларни жалб этиб, селексия ишлари ва ўқув дастурини тўғри шакллантириш бўйича кўрсатмалар берган.
Шу билан Шавкат Мирзиёев Қашқадарё вилоятига ташрифини якунлаб, Тошкентга қайтиб келган.
Мавзуга доир:
- Қашқадарёда 1 823 километр ичимлик суви тармоқлари, 74 та сув иншооти қурилади ва реконструкция қилинади
- «Кўкдала ва Чироқчи туманларида ҳар бири камида 500 мВт қувватга эга 2 та қуёш фотоэлектр станциясини қуриш бўйича лойиҳаларни амалга оширишни бошлаш зарур» — президент
- Шавкат Мирзиёев Абдулла Орипов ҳаёти ва ижодига бағишланган фильм олиш бўйича топшириқ берди
Изоҳ (0)